O río Ubangi ye un río africano, afluent d'o río Congo (en ye un d'os suyos afluents prencipals). O suyo naixedero ye en a unión d'os ríos Mbomou y Uele y a suya desembocadura ye en o río Congo, dimpués d'un recorrito d'una longaria de 2.272 km en trescruzando a Republica Centroafricana, a Republica Democratica d'o Congo y a Republica d'o Congo. Ista longaria ye calculata en sumar a o río o recorrito d'o suyo afluent o río Uele; dende a confluencia d'o Uele con o Mbomou, a suya longaria ye nomás de 1.120 km.
A superficie d'a suya cuenca hidrolochica ye de 754.830 km², y o suyo cabal en a confluencia con o río Congo ye de 5.936 m³/s.
Dende o suyo naixedero, o río marcha ta l'ueste 350 km, dimpués ya o sud-ueste, en trescruzando Bangui, a capital d'a Republica Centroafricana, y dimpués marcha ta o sud arredol de 500 km dica a suya confluencia con o río Congo. Dende o suyo naixedero dica bels 100 km dimpués de Bangui, o río Ubangi fa de muga entre a Republica Centroafricana y a Republica Democratica d'o Congo, ta dimpués estar a frontera entre iste segundo país y a Republica d'o Congo dica desauguar en o río Congo.
O río Ubangi ye navegable en o suyo curso baixo y meyo, dica Bangui, con linias regulars de transporte fluvial dende Brazzaville y Kinshasa, en o río Congo.
Vinclos externos
Categoría:Afluents d'o río Congo Categoría:Ríos d'a Republica Centroafricana Categoría:Ríos d'a Republica Democratica d'o Congo Categoría:Ríos d'a Republica d'o Congo