Juan Maluquer de Motes i Nicolau, naixito de Barcelona (Barcelona, Catalunya) en 1915 y muerto en Artesa de Segre (Leida, Catalunya) en 1988, estió un arqueologo y prehistoriador catalán, con importants treballos en a Prehistoria y a Historia antiga d'a peninsula iberica.
Anyadas de formación Juan Maluquer de Motes estudió Filosofía y Letras (branca d'Historia) en 1931-1936 en a Universidat de Barcelona, a on estió alumno de mayestros como Pere Bosch Gimpera u Lluís Pericot i García.
Vida profesional En 1939, en rematar a Guerra Civil espanyola, dentró en a Universidat de Barcelona, pa treballar con o catedratico impuesto por o nuevo rechimen franquista, Martín Almagro Basch. En 1949 ganó a catedra de Prehistoria d'a Universidat de Salamanca, ta convertir-se en 1958 en catedratico d'Arqueolochía en a Universidat de Barcelona. En chubilar-se Lluís Pericot i García, en 1969, se convertió en catedratico de Prehistoria en ista mesma Universidat dica a suya propia chubilación en 1985.
En istas anyadas establió cuantas revistas cientificas sobre as suyas arias tematicas de treballo, y estió amás decán d'a Facultat de Filosofía y Letras.
Antiparte, fació treballos de campo en muitos chacimientos arqueolochicos, como os chacimientos d'Alto de la Cruz (en Corz, Navarra), Puig de Sant Andreu (Ullastret, Catalunya), Molí de l'Espígol (Tornabous, Catalunya), La Palma (Tortosa, Catalunya), Santa Bàrbara (Mianes, en Vinallop, Tortosa) u Cancho Roano (Zalamea de la Serena, Extremadura).
Categoría:Arqueologos de Catalunya Categoría:Licenciaus en Filosofía y Letras Categoría:Muertos en Artesa de Segre Categoría:Naixius de Barcelona Categoría:Prehistoriadors de Catalunya Categoría:1915 (naixencias) Categoría:1988 (muertes)