''Iste articlo ye sobre un politico aragonés, president d'a Deputación Cheneral d'Aragón; ta atros usos, se veiga José Marco.
José Marco Berges (Pedrola, Ribera Alta de l'Ebro, Zaragoza, 10 de chinero de 1950) ye un politico y profesor de Filosofía aragonés. Estió President d'a Deputación Provincial de Zaragoza (DPZ) entre 1993 y 1995.
Biografía Licenciau en Filosofía y Letras, cursó estudios en o Seminario y en as universidaz de Roma, Valencia y Zaragoza. Exerció a docencia en Covaleda (Soria) y dimpués en l'academia d'amostranza d'a que yera titular.
Prencipió a suya carrera politica como alcalde independient de Pedrola en 1979, dentrando posteriorment en o PSOE.
Dende o 9 de chulio de 1987 dica o 27 de setiembre de 1993 estió president d'a Deputación Provincial de Zaragoza.
Estió alcalde de Pedrola dica 1993.
Secretario cheneral d'o PSOE-Aragón con os refirmes d'a corrient guerrista dende 1989. Miembro d'o Comité Federal d'o PSOE dende 1985 dica 1993.
En 1991 encabezó a lista a las autonomicas de 1991, en as que o PSOE estió o partiu mas votau (30 escanyos), pero no obtenió a mayoría absoluta (34 escanyos). Ello posibilitó a creación d'un gubierno de coalición entre o Partido Popular (17 escanyos) y o Partido Aragonés (17 escanyos), y a investidura d'Emilio Eiroa García (PAR) dimpués de l'aprontada renuncia d'Hipólito Gómez de las Roces, que heba encabezau a lista d'o PAR.
En setiembre de 1993, José Marco presentó una moción de censura contra o gubierno d'Emilio Eiroa que triunfó en o pleno d'o 15 de setiembre, por lo que Marco se convertió en President d'o Gubierno d'Aragón con os votos afirmativos d'o suyo partiu PSOE (30), IU (3) y un trasfuga clamau Emilio Gomáriz elechiu por o PP (1) y os votos negativos d'o PAR (17) y o PP (16).
En chinero de 1995 o PAR solicitó a creyación d'una comisión pa aclarar por qué en estar preguntau en sesión de Corz por o suyo patrimonio, no heba ementau a compra d'un campo de alfalz de 200 m² que no constaba en a suya declaración de renta, encara que sí en a d'a suya muller.
En 1995 tenió dos procesos chudicials, o d'as ascuitas; y o d'o sillón. Por iste segundo fue imputau a petición d'o fiscal chefe de Zaragoza porque le'n acusaba por mercar un sillón cuan yera president d'a Deputación Provincia de Zaragoza y quedarse-lo. Beluns d'os suyos consellers sucherioron a José Marco que dimitiera, pero él atrasó a decisión, por considerar que no recibió o sillón, ya que a factura inculpatoria yera falsa, ya que yera la unica feita a man en tot l'anyo por ixa empresa, y calendada o zaguer domingo de chulio, que no viviba en Conde Aranda 6 (Escolapios), y que no conoixeba a o sinyor Blanco a qui heba d'haber feito o encargo.
Se veyió obligau a albandonar a Secretaría Cheneral d'o PSOE-Aragón, por orden de Ciprià Císcar, fue expedientau, y suspendiu de militancia.
Fracasau o intento de que debant d'o Gubierno d'Aragón le succediera Ángela Abós, Ramón Tejedor Sanz se fació cargo d'a presidencia en funcions dica as eleccions de mayo de 1995.
A resultas d'o proceso incoau, con motivo d'as ascuitas telefonicas que dicen ordenó realizar, fue condenau a seis anyos d'inhabilitación especial.
Dende alavez, ye alpartau de toda actividat politica, s'adedica a chestionar negocios, entre ellos a empresa de transporte Bonavía, y a gasolinera y hotel-restaurant El Castillo, situaus en Pedrola (N-232).
Referencias
Se veiga tamién Gubierno Marco
Categoría:Alcaldes de Pedrola Categoría:Alcaldes d'o Partido de los Socialistas de Aragón Categoría:Alumnos d'a Universidat de Roma La Sapienza Categoría:Alumnos d'a Universidat de Valencia Categoría:Alumnos d'a Universidat de Zaragoza Categoría:Deputaus d'a III Lechislatura d'as Corz d'Aragón Categoría:Deputaus en as Corz d'Aragón por a circumscripción electoral de Zaragoza
Categoría:Naixius de Pedrola Categoría:Presidents d'a Deputación Cheneral d'Aragón Categoría:Presidents d'a Deputación Provincial de Zaragoza Categoría:Politicos d'Aragón Categoría:Politicos d'o Partido de los Socialistas de Aragón Categoría:Secretarios chenerals d'o Partido de los Socialistas de Aragón Categoría:1950 (naixencias)