Os udis son un grupo etnico que habita en os poblatos de Nidz y Vartashen (Norte d'Azerbaichán) y en Zinobiani (Este de Cheorchia). A suya luenga ye d'a branca daguestaní d'as luengas caucasicas y son cristianos. Son un pueblo interesant dende o punto de vista historico porque son o zaguer resto d'os albans, una important gran nación caucasiana cristiana desapareixita homonima d'os albaneses balcanicos. Se calcula que son unos 7000 individuos.
Os udi de Vartashen y Zinobiani perteneixen a la mesma ilesia que os cheorchianos, manimenos os que viven en Nidz son monofisistas como os armenios, (historicament os armenios contribuyoron a la desaparición d'os albans como nación diferent cuan los sozmetioron a autoridaz relichiosas armenias). En as suyas cerimonias relichiosas bi ha restos d'un culto a la luna, y se sabe que a luna yera a divinidat prencipal d'os albans caucasians.
A economía tradicional d'os udis se basa en l'agricultura y en a horticultura. As suyas casas son de piedra en Azerbaichán y de fusta en Cheorchia, tienen una chaminera en a cantonera que fan servir pa secar y almacenar fruita. A suya vestimenta ye d'influencia acerina. A suya cultura ye muito influita por a cultura d'os azerins, armenios y cheorchianos.
Luenga Tien dos dialectos, o vartashen, (que se charra en Vartashen y Zinobiani), y o nidz, que se charra en Nidz. Ni l'un ni l'atro lo fan servir como luenga escrita, en Cheorchia escriben en cheorchiano y en Azerbaichán escriben en azerín u armenio
Bibliografía Gonen, Amiram. Diccionario de los pueblos del mundo. Editorial Anaya, 1996. ISBN 978-8479793500.
Categoría:Pueblos d'o Caucas Categoría:Etnias d'Azerbaichán Categoría:Etnias de Rusia Categoría:Etnias de Cheorchia Categoría:Etnias d'Armenia