Os meskhi u meskhetas (en turco Ahıska Türkleri, en idioma cheorchiano მესხეთის თურქები, Meskhetis t'urk'ebi) son os habitants musulmans que i heba antes de 1944 en a rechión de Meskh (sud-ueste de Cheorchia, a lo canto d'a muga con Turquía). Yeran d'os grupos etnicos carapapakh, kurdo u chechén, u de faccions islamizatas d'o pueblo armenio (hamxenis) u cheorchiano, y fuoron deportatos por as autoridaz sovieticas ta Uzbekistán. En os anyos de deportación en Uzbekistán desarrolloron una concencia etnica común y encomenzoron a definir-sen como turcos meskhi. Actualment charran una luenga turquica. Son mayoritariament musulmans sunnitas seguidors d'a escuela Hanafí, pero con una minoría de chiitas.
Historia En o sieglo XVI os otomans conquirioron o sud-ueste de Cheorchia y muitos cheorchianos y individuos d'atros pueblos caucasicos como os laces se convirtioron a lo islam. Os cheorchianos d'a rechión d'Ajaltsije fuoron mes luent, deixoron a luenga cheorchiana por a luenga turca y d'alcuerdo con bellas fuents se convirtioron a la forma chiitaAndré Sellier: Atlas de los pueblos de Oriente d'a relichión musulmana.
I habió continos cambios de mugas dica o tractau de Kars de 1921, cuan Turquía recuperó Ardahán y s'estabilizó a muga entre Turquía y Cheorchia. En o costato norte d'a muga, en territorio cheorchiano quedoron poblacions musulmanas que en 1926 yeran censatas como turcos. O 15 de noviembre de 1944 os musulmans de Ajaltsije y a rechión de Meskhet fuoron deportatos en masa ta Uzbekistán. Entre os musulmans deportatos de Meskhet i heba a mes de cherchians musulmans, armenios musulmans (hamxenis) y turcos carapapakhes. A población musulmana de Meskhet fue deportata a lo mesmo tiempo que os kurdos d'o sud de Cheorchia y os laces d'Acharia y en total estioron 200.000 personas.
Os musulmans de meskhet desarrolloron una concencia etnica común y encomenzoron a definir-sen como turcos meskhi en os anyos de deportación en Uzbekistán. No fuoron "rehabilitatos" en l'anyo 1957 a diferencia d'os calmucos, chechens, inguixes y atros "pueblos castigatos".
En os anyos sesanta y setanta prenioron notoriedat por a luita pa que los permetesen tornar ta Cheorchia u emigrar ta Turquía. En 1989 bi habió pogroms contra os Meskh en a val de Fergana d'Uzbekistán, y muitos Meskh fuyoron ta atras parz d'a URSS. Agora son en un proceso de lenta tornata ta Cheorchia.
Referencias
Bibliografía Gonen, Amiram. Diccionario de los pueblos del mundo. Editorial Anaya, 1996. ISBN 978-8479793500. Jean Sellier y André Sellier: Atlas de los pueblos de Oriente. Acento Editorial.
Categoría:Pueblos turquicos d'o Caucas Categoría:Etnias de Cheorchia Categoría:Etnias d'Azerbaichán Categoría:Etnias de Rusia