Saga pedo ye un insecto ortoptero escaso que se distribuye dende a peninsula iberica dica o nord-este de China y ye l'ortoptero mes gran d'Europa.
Descripción A suya largura plega a 12 cm. O suyo cuerpo ye muito estirato, con un oviscapto muit visible y unas antenas igualment luengas y insertas entre os uellos.
As patas presentan femurs y tibias con punchas pa ensopinar as suyas presas (por un regular atras grillas), d'una traza pareixita a un plegamans.
No se conoixe o masclo, només a fembra, que ye tetraploide y se reproduce por partenochenesi (Kallenbach, 1967).
Distribución Se distribui por China nortoccidental, Kazaquistán, Uzbekistán, Tachiquistán, Azerbaichán, Cheorchia, Rusia, Rumanía, Bulgaria, Eslovaquia, Chequia, Hongría, Sicilia, Cerdenya, Corcega, Occitania y Espanya. En Espanya s'ha citato d'as provincias de Albacet, Badajoz, Ciudad Real, Cuenca, Toledo, Segovia, Madrit, Valencia, Tarragona, Chirona y Zaragoza. A cita d'Aires y Menano de 1916 pa Portugal la han descartata bels autors uno dimpués d'atro.
Habitat Se troba en gran variedat d'habitats, ye una especie xerotermofila que puet amaneixer en cualsiquier tipo de vechetación, y lo han descrito en pueyos, marguins de selvas, puestos con hierba alta, chinebrals, sabinars, restrollos. En Catalunya lo han trobato en maticals silicicolas formatos por estepas, bruecos y barzas dende 70 dica 1.065 m sobre o livel d'a mar. En Albacet se troba dica l'altaria de 1.540 m en Cerro Padrón. En a provincia de Zaragoza ye citato d'o galacho de l'Alfranca.
Conservación A UICN lo declara vulnerable. Esta especie ye catalogata por o catalogo d'as especies amenazatas d'Aragón como d'intrés especial por o Decreto 49/1995, d'o 28 de marzo.
Bibliografía Manuel Alcántara de la Fuente (coordinador). Catálogo de Especies amenazadas de Aragón (fauna). Gobierno de Aragón (Departamento de Medio Ambiente). 2007. Jose R.Verdú y Eduardo Galante. Libro rojo de los invertebrados de España. Ministerio de Medio Ambiente, Organismo autónomo de Parques Nacionales. 2006.
Vinclos externos Fotos de Saga pedo en localidaz zaragozanas
Pedo Categoría:Insectos d'Aragón Categoría:Fauna d'Asia