Os caixubos (en caixubo kaszëbi, en polaco kaszubi; en alemán kaschuben) son un pueblo que habita l'este de Pomerania y a zona d'o corredor de Danzig y son en camín d'asimilación a los polacos. Charran una luenga eslava occidental, o caixubo, que ye d'una branca diferent a lo polaco, y son cristianos catolicos u luteranos.
A prencipal ciudat d'os caixubos ye Wejherowo (Wejrowo en caixubo). Entre as ciudaz grans de Polonia, Gdynia (Gdiniô en caixubo) ye a que tien o porcentache mes alto de caixubos.
Modo de vida tradicional Os caixubos yeran tradicionalment agricultors y tamién bi n'heba que se dedicaban a la pesca. Huei os caixubos gosan dedicar-sen a l'agricultura y o sector servicios, como por eixemplo l'agrotorismo.
Historia Han tenito una larga historia como pueblo baixo dominio alemán mientres o reino de Prusia, minorizato en a expansión alemana enta l'este, pero que no se chermanizó como os atros vendos. Os polacos consideran a los caixubos como parte d'o pueblo polaco. Pa o estato polaco a presencia d'os caixubos eslaus, consideratos como polacos, estió una ferramienta politica pa chustificar a inclusión d'o corredor de Danzig en Polonia mientres as discusions d'o Tractau de Versailles, considerando que ya i heba una población polaca antiga.
Caixubos famosos
Günter Grass, escritor en luenga alemana, qui en beluns d'os suyos libros, como O tambor de lata (Die Blechtrommel) (1959), admite a suya identidat caixuba. Gerard Labuda, historiador. Aleksander Majkowski, escritor. Danuta Stenka, actriz. Donald Tusk, politico, líder de Platforma Obywatelska.
Categoría:Pueblos eslaus Categoría:Etnias de Polonia Categoría:Etnias d'Alemanya