Juan Cabañero y Esponera, naixito d'Urreya de Gayén (hue en o Baixo Martín, Teruel) en 1798 y muerto o 3 de mayo de 1850 en Albalat de l'Arcebispe (Baixo Martín, Teruel), estió un militar aragonés, conoixito por a suya participación en as Guerras Carlistas, cuan dimpués de dentrar en Belchit o 4 de marzo de 1838 tentó de conquerir a ciudat de Zaragoza en a dita Cincomarzada (mientres a Primera Guerra Carlista), o 5 de marzo de 1838, y fue redotato por a población d'a ciudat, que dende ixas envueltas commemoran a suya victoria con una fiesta popular.
Cabañero partecipó tamién en atras accions militars con os sublevatos carlistas: o 20 de marzo de 1838 as suyas tropas redotoron a os liberals en Molina d'Aragón (Guadalachara) y dentroron en Calatayú o 27 d'abril. En chulio de 1838 con un batallón de soldatos aragoneses, o VI Batallón d'Aragón, esfendió a ciudat de Moriella (Castellón).
Sindembargo, en estar en desalcuerdos con Ramón Cabrera, qui manaba o frent aragonés ta os carlistas en a guerra, demandó ser tresladato a o Frent d'o Norte, en combatindo en tierras de Navarra mandato por Rafael Maroto, qui o 31 d'agosto de 1839 signó o Convenio de Bergara, que remató a guerra en Navarra y o País Basco. Asinas, Cabañero s'adhibió a os liberals contra o suyo antigo chefe, Cabrera, qui continó con a guerra en Aragón, País Valenciano y sud de Catalunya. Cabrera mandó fusilar a o fillo de Cabañero, un mozo de 18 anyadas, a man de Moriella.
En 1848-1848, mientres a Segunda Guerra Carlista, Cabañero tornó a aduyar a os liberals contra os carlistas en as comarcas teruelanas d'o Mayestrato y d'o Baixo Aragón.
En 1849, Cabañero fue nombrato Gubernador Militar de Teruel, feito que provocó polemicas con os republicanos d'a provincia, que no confiaban en a suya fidelitat a o liberalismo.
Bibliografía consultata José Ramón Villanueva Herrero: [https://web.archive.org/web/20071020145029/http://www.cehijaranos-bajomartin.com/WEB/COMARCA.general/La%20evoluci%C3%B3n%20pol%C3%ADtica%20de%20Juan%20Caba%C3%B1ero%20y%20Esponera.pdf La evolución política de Juan Cabañero y Esponera: De General Carlista a militar "convenido"]. Cabañero y Esponera, Juan, en a Gran Enciclopedia Aragones online''.
Categoría:Militars d'Aragón Categoría:Militars d'a Primera Guerra Carlista Categoría:Militars d'a Segunda Guerra Carlista Categoría:Muertos en Albalat de l'Arcebispe Categoría:Naixius d'Urreya de Gayén Categoría:1798 (naixencias) Categoría:1850 (muertes)