A batalla d'o paso de Kasserine estió una batalla d'o Frent d'Africa d'o Norte mientres a Segunda Guerra Mundial, que fa parte d'a campanya de Túniz. En a batalla, que escomenzó o 19 y remató o 25 de febrero de 1943, luitoron tropas de l'Exercito estausunidense (II Cuerpo d'Exercito) mandatas por Lloyd Fredendall y d'a Wehrmacht d'o Tercer Reich (a 10ena División Panzer y a 21ena División Panzer d'o Deutsches Afrika Korps) mandatas por Erwin Rommel, en a que estió a primera batalla important entre os exercitos alemán y estausunidense en a guerra, y remató con una victoria alemana, encara que ista victoria no tenió garra influencia en o desarrollo posterior d'as operacions militars (nomás que fació augmentar a prudencia de l'abance aliato). Antiparte, ista batalla estió a zaguera victoria d'o Deutsches Afrika Korps (os suyos repuis se rindioron a os Aliaus o 12 de mayo).
En puridat, no estió una sola batalla, sino que estió una serie succesiva de luitas por o control d'o paso de Kasserine, una depresión de 3 km de longaria que trescruza o macizo d'a dorsal tuniciana en a cadena montanyosa d'a cordelera de l'Atlas, en l'ueste de l'actual Túniz y a man d'a localidat tuniciana de Kasserine.
Categoría:Batallas d'Alemanya Categoría:Batallas d'Estaus Unius Categoría:Batallas d'o Frent d'Africa d'o Norte Categoría:Batallas de 1943