Good Bye, Lenin! (títol orichinal en anglés en Alemanya y estrenada con ixe mesmo títol en Aragón) ye una cinta alemana de l'anyo 2003, dirichida por Wolfgang Becker, y o suyo elenco d'actors incluye a Daniel Brühl, Katrin Sass, Chulpan Khamatova, y Maria Simón. A dirección de fotografía d'a cinta ye de Martin Kukula, a suya banda sonora orichinal de Yann Tiersen y Claire Pichet y la suya producción cinematografica ye al cudiau de Stefan Arndt ta la productora cinematografica X-Filme Creative Pool.
A gran parti d'as escenas fuón presas en a Karl-Marx-Allee en a ciudat alemana de Berlín y arredol d'as Plattenbauten (edificios similars a los bloques impersonals construyius en Aragón mientres o franquismo) amán de l'Alexanderplatz.
Sinopsi Octubre de 1989 no yera o millor inte ta dentrar en coma vivindo en Republica Democratica Alemana, y ixo ye chusto lo que le pasa a la mai d'Alexander Kerner (Daniel Brühl), Christiane, una muller orgüellosa d'as suyas ideyas socialistas y dirichent d'o Sozialistische Einheitspartei Deutschlands (Partiu Socialista Unificau) entregada a la politica dimpues d'a marcha d'o suyo hombre enta l'Alemanya Occidental, que tresbate l'esmo en veyer a lo suyo fillo ficau en disturbios a radiz d'una manifestación en contra d'Erich Honecker, con a policía de l'estau que tanto almira. Alex se veye enrolau en una complicada situación cuan a suya mai sale d'o coma ueito meses dimpués. Garra atra cosa podría afectar tanto a la suya mai como a cayida d'o Muro de Berlín y a victoria d'o capitalismo en a suya quiesta Alemanya Oriental, y ya advertiu por o medico de deixar-la reposar y sin grans disgustos, ta evitar una posible recayida, ocultará a la suya mai que o muro de Berlín ha cayiu mientres que ella yera malauta. Ta ixo, monta una serie de falsos telediarios, con aduya d'o suyo amigo Denis, en os que escribirá la suya propia historia d'o país.
Por ixo, ta salvar a la suya mai, Alex converte o piso familiar en una isla anclada en o pasau, una mena de zaguer bastión d'o socialismo en o que la suya mai vive creyendo que brenca no ha cambiau. O que prencipia como una mentira piadosa se transforma en una gran estafa cuan a chirmana d'Alex y bels vecins s'encargan de mantener a farsa ta que a mai d'Alex contine creyendo que brenca no heba cambiau. Una d'ellas ye Lara, una enfermera sovietica que Alex conquista mientres o coma d'a suya mai. Finalment muere sabendo por Lara, en una d'as escenas antes de veyer o zaguer telediario que ha parau o suyo fillo, que Alemania ye agora un solo país y que o muro ye estau ubierto.
Paralela a la pelicula, tamien se planteya a busca d'o pai d'Alex.
Curiosidaz O director ye Wolfgang Becker (Renania d'o Norte-Westfalia, 1954); a filmografía d'o cual se compone d'as cintas Schmetterlinge (1987) y Das Leben ist eine Baustelle (1997) entre atras. Tamien ye l'autor de l'episodio d'a serie de television Tatort titulau Blutwurstwalzer (1991) y d'o telefilm Kinderspiele (1992). Os suyos protagonistas son Daniel Brühl, Katrin Saβ, Chulpan Jamatova y a cuasi debutant Maria Simon. O guión ye escrito por o propio director en colaboracion con o debutant Bend Lichtenberg. O director de fotografía ye Martin Kukula, que ya heba treballau con Becker en Das Leben ist eine Baustelle, y a banda sonora ye compuesta por Yann Tiersen (Amélie). Un d'os personaches secundarios en a trama ye un taxista dito Stefan Walz, que estió astronauta mientres a RDA. O personache ye inspirau en l'astronauta y mito d'a RDA Sigmund Jähn, encara que iste no remató como taxista dimpues d'a reunificación, sino como consultor d'a DLR (Deutsches Zentrum für Luft- und Raumfahrt e.V. u Achencia Espacial Alemana), heredera de l'Achencia de l'antiga Alemanya Oriental, y mas tardi de l'Achencia Espacial Europea. O piso d'a mai d'Alex ye ubicau en o districto berlinés de Friedrichschain y gran parti d'as escenas fuón presas astí, mesmo una d'as mas importants; cuan a mai d'Alex decide de salir d'o piso; manimenos Friedrichshain ye nomás mencionau por Denis que en as noticias montadas dimpués d'a escena. Cuan Alex chunto con o suyo amigo paran a cambra ta que la suya mai torne y lo trobe tot igual, a musica de fundo y a velocidat d'o film ye a mesma que cuan Alex en A Clockwork Orange tien relacions con dos mesachas en a suya cambra. L'edificio que Alex y Denis emplegan en o suyo informe sobre a Coca Cola ye o mesmo que Billy Wilder fació servir en a cinta One, Two, Three. (1961). S'insertó material d'archivo en un contexto diferent y manipulau dichitalment. En dos escenas Denis leva una camiseta negra con simbols verdes, parellanos a lo codigo de The Matrix. Una posible explicación ye que o disenyo ye una ideya d'o propio Dennis ta una cinta, y que Matrix, en consecuencia, ye socialista como a Coca Cola, seguntes una broma d'o filme.
Errors Cuan Alex coloca en viellos embalaches d'a RDA os nuevos productos de birolla que han prencipiato a vender-se en Berlín oriental, se veye un paquet de Jacobs Kaffee. O logo d'o paquet no ye o logotipo d'ixas envueltas sino una versión mas nueva de l'anyo 2000. Cuan os instaladors d'antenas parabolicas se miran un partiu de fútbol ta comprebar o funcionamiento de l'antena, a imachen corresponde a l'Eurocopa de 1996, mientres que a escena ye de 1990. Un d'os sinyals alemans que se veyen en a celebración d'a victoria de l'equipo alemán en o Mundial ye d'una decada dimpues d'a Reunificación. En una vesita d'Alex a un supermercau dimpués d'a Reunificación d'Alemanya, una treballadora ye etiquetando latas de Pepsi con un disenyo que no s'adoptaría dica bels anyos dimpués, bien dentraus os anyos 1990. Cuan Denis l'amuestra a Alexander a cinta d'un casorio, aquel leva mesa una camiseta con motivos (plevia dichital) de The Matrix, un filme estrenau en 1999.
Premios Se presentó en o Festival Internacional de Cine de Berlín de 2003, an que consiguió o Premio Ánchel Azul a la millor cinta europea. Ganó lo Premio Especial d'o Churau en o Semana Internacional de Cine de Valladolit en 2003. Consiguió os Premios d'o Cine Europeu 2003 a Millor Cinta, Millor Actor (Daniel Brühl) y Millor Guionista, asinas como toz os premios d'o publico (Millor Director, Millor Actor y Millor Actriz, iste zaguero ta Katrin Saß).
Se veiga tamién Cine en 2003. Cintas de 2003. Die fetten Jahre sind vorbei.
Referencias
Vinclos externos Pachina web oficial d'a cinta. Good bye, Lenin! en IMDb.
Categoría:Cintas con banda sonora orichinal de Claire Pichet Categoría:Cintas con banda sonora orichinal de Yann Tiersen Categoría:Cintas con dirección de fotografía de Martin Kukula Categoría:Cintas con guión de Bernd Lichtenberg Categoría:Cintas con guión de Wolfgang Becker Categoría:Cintas con montache de Peter R. Adam Categoría:Cintas d'Alemanya Categoría:Cintas de cine de drama Categoría:Cintas de cine de comedia Categoría:Cintas dirichidas por Wolfgang Becker Categoría:Cintas en alemán Categoría:Cintas interpretadas por Alexander Veyer Categoría:Cintas interpretadas por Chulpan Khamatova Categoría:Cintas interpretadas por Daniel Brühl Categoría:Cintas interpretadas por Florian Lukas Categoría:Cintas interpretadas por Katrin Sass Categoría:Cintas interpretadas por Maria Simon Categoría:Cintas producidas por Stefan Arndt Categoría:Premio Ánchel Azul Categoría:Premio d'o Cine Europeu a la Millor Cinta Categoría:Premio d'o Cine Europeu a o Millor Guionista Categoría:Premio Jameson d'o Publico a o Millor Director Europeu Categoría:Premio Jameson d'o Publico a o Millor Actor Europeu Categoría:Premio Jameson d'o Publico a la Millor Actriz Europea