Lug ye o dios con mayor presencia en a mitolochía irlandesa, y que recibió mes que atros dioses en Irlanda, Britania, Galia, Celtiberia y talment en toz os países celtas. Estió un dios que cubriba muitas funcions. En a interpretatio romana fue asimilato a Mercurio. O suyo nombre ha perdurato en a toponimia en nombres de ciudaz y en a literatura universal a traviés de personaches d'o ciclo arturico. L'1 d'agosto se celebra a fiesta de Lug u "Lugnasad".
Teonimia y toponimia O teonimo Lug lo relacionan con una radiz indoeuropea que en griego antigo ha dato Leukos, "blanco" y en latín lux-lucis, "Luz". A radiz ye cerca d'a palabra que en bel idioma celta designa a una especie de corvido, y talment por ixo l'animal de Lug siga o cuervo, como dimpués n'estaría d'Odín.
Son muitos os toponimos que se remontan a "fortaleza de Lug" - Lugdunum como "León d'el Roine" y "Leiden". "Sent Bertran de Comenges" fue fundau como Lugdunum por Pompeyo. Manimenos tamién s'ha desacherau muito este aspecto y no toz os que tienen un pareixiu fonetico pueden interpretar-sen asinas. Por eixemplo Luco de Bordón y Luco de Xiloca millor s'interpretan dende o latín Lucus, "calvera en a selva". O mesmo podríanos dicir de Lviv (Ucraína).
Culto de Lug entre os celtibers y pueblos afins En Penyalba de Bellestar (Comunidat de Teruel) recibiba culto y unas inscripcions testimonian o suyo culto.
Lug en Galia Chulio César se refiere a éll como Mercurio en Bello Gallico.
Lug en a tradición britana y en os mitos arturicos En os Mabinoggion bi ha un personache que talment se remonte a Lug y que se diz Lleu Llaw Gyffes. A parte d'o pareixito fonetico tenemos a coincidencia que fa de zapatero en parte d'a suya historia, coincidindo con un atributo que tien o Lug irlandés.
Por o que respecta a los mitos arturicos a lo principio o dios orichinal "Lug" quedó redueito a la figura d'o rei Loth. Manimenos en a tradición bretona-armoricana o recuerdo d'o dios Lug evolucionó enta un personache diferent, que fue adhibito a los personaches arturicos como Lancelot por Chretien de Troyes enta l'anyo 1160.
Lug en a tradición irlandesa Lug ye qui permite que a dinastía divina Tuatha de Dannam venza a los Fomore (representants d'o casos y equivalents d'os titans u os chigants en atras mitolochías). Lug ye tamién o pai d'o heroe irlandés Cuchulainn.
Bibliografía Jean Markale Pequeño diccionario de mitología céltica. Alejandría, 1995. 2000.
Categoría:Dioses celtas Categoría:Dioses d'a Hispania prerromana