A carioferina β («carioferina beta») ye una proteína, d'o grupo funcional d'as carioferinas, involucrada en o transporte de biomoleculas d'entre o citoplasma y o nuclio celular.
Actuación
A carioferina β actúa doblement: Puede operar como importina en a «importación» cara a o nuclio celular, u fer d'exportina en a «exportación» cara a o citosol.
Cuan actúa como importina, a carioferina β tiene la propiedat de ligar-se fuertement con a carioferina α en a vía d'as carioferinas α y β, y de desunir-se d'ista y d'a suya molecula de carga, tot liberando-la, cuan se troba con una molecula de RanGTP activa en l'interior d'o nuclio. O cambio de conformación tridimensional que a proteína Ran le prevoca no se conoix encara guaire bien, pero el que sí que pareix claro ye que cuan se desprende d'a carga importada, a carioferina gana afinidat per a propia Ran y se i une con fuerza. En iste estau, a carioferina β puede actuar como exportina ta la proteína Ran, meyando la conducción cara a o citoplasma a traviés d'o complexo de poro nucleyar. Un efecto colateral d'iste fenomeno, con muita aplicación en a celula viva, consiste en que a proteína Ran se presente a la carioferina β unida con a suya propia carga, en formando el que bel uns identifican como «complexo ternario» d'a exportación nucleyar. Asinas, a función exportadera d'a carioferina s'aprofeita ta exportar altras moleculas cara a lo citosol cuan van unidas a la forma RanGTP d'a proteína Ran.
Iste ciclo curto remata cuan, en habendo travesau lo compexo de poro nucleyar, RanGTP (trifosfato) sufre una hidrolisi (defosforilación) d'o mononucleotido de guanina y pasa a o estau de RanGDP (difosfato), per partes d'a proteína RanGAP. A fosfatasa RanGAP ye una proteína libre en Saccharomyces, pero se troba ligada contra lo complexo de poro nucleyar en plantas y animals, per el que la dita defosforilación ocurre a l'inte en istes organismos. O cambio de conformación d'a proteína Ran en estau RanGDP fa que se trenque la unión con carioferina β, que alavez torna a quedar libre en o citoplasma.
Se veiga tamién Carioferina α Proteína Ran Envoltura nucleyar Nucleotido Fosforilación
Categoría:Carioferinas