L'aragonés centro-occidental ye l'aragonés que se charra entre a cuenca alta d'o río Galligo, dende a Val de Tena dica o Sarrablo y dende Vallibasa y Sobrepuerto dica a val d'Acumuer. Presenta as caracteristicas foneticas de l'aragonés central y lexico común con l'aragonés occidental.
Fonetica D'alcuerdo con l'aragonés central presenta una menor resistencia a la sonorización d'as oclusivas xordas intervocalicas latinas que l'aragonés cheneral, conservando-se a xorda localment en bella parola en a que l'aragonés cheneral sonoriza. A conservación afecta a lo participio, que ye en -ato, -ito reblando debant d'as formas chenerals en -au, -iu.
O tensín presenta mayor tendencia que atras variants d'aragonés a la sonorización dezaga de liquida, coincidindo con l'aragonés centro-oriental: Grupo -MP- > -mb-: Embolla: ampolla. Cambo en Panticosa, coincidindo con l'aragonés centro-oriental de Torla, Oto, Broto, Buesa, Fanlo, Buisán, Yosa. Grupo -NT- > -nd-: Planda y punda en aragonés panticuto, coincidindo con l'aragonés d'a valle de Vio. Grupo -NK- > -ng-: Blango, bango, chungo. Barrango, palanga y cingüenda en aragonés panticuto. Grupo -RT- > -rd-: Xordica (y a variant chordica con xeada).
A evolución d'a -X-, -SK- y -PS- latina ye en -x-, como en aragonés occidental, a diferencia de l'aragonés oriental y centro-oriental.
Morfolochía L'articlo o, os, a, as presenta a variant postvocalica ro, ros, ra, ras coincidindo con part de l'aragonés centro-oriental y d'o Semontano de Balbastro.
Variants Son parlas aragonesas centro-occidentals: Aragonés d'a Val d'Acumuer. Aragonés d'a Tierra de Biescas. Aragonés sarrablés. Aragonés de Sobrepuerto. Aragonés tensino (con l'aragonés pandicuto como parla local millor conservata y documentata). Aragonés de Vallibasa.
Bibliografía Anchel Conte et al. El aragonés: identidad y problemática de una lengua. Colección Aragón. Librería general. Chabier Tomás Arias. El aragonés del biello Sobrarbe. Instituto de Estudios Altoaragoneses, 1999.
Centro-occidental