O Teatro romano de Caesaraugusta ye un teatro d'a epoca romana construito en a primera metat d'o sieglo I d. C. (gubiernos de Tiberio y Claudio) en Caesaraugusta, actual Zaragoza. Teneba capacidat ta bels seis-mil espectadors y seguiba o modelo d'o teatro Marcelo de Roma. Estió en uso dica o sieglo III en que os suyos materials fuoron reaproveitatos ta construir murallas y atras edificacions. En 1974 unas prospeccions arqueolochicas lo sacoron a la luz y actualment se puet vesitar en o marco d'o Museu d'o Teatro de Cesaraugusta. O 8 d'octubre de 2001 fue declarato Bien d'Intrés Cultural en a categoría de molimento. VV. AA., Renovación del Plan Integral del Casco Histórico de Zaragoza 2005-2012, Zaragoza, Gerencia Municipal de Urbanismo del Ayuntamiento de Zaragoza, pág. 65.

Historia A construcción d'o teatro romano de Caesaraugusta prencipió en primerías d'o sieglo I d. C., en a epoca de l'emperador romano Tiberio, y as suyas obras rematoron baixo o gubierno de l'emperador Claudio, a meyatos d'o primer sieglo d'a nuestra era. A suya superficie yera de 7.000 metros cuadratos (106 metros de diametro) y teneba capacidat ta bels 6.000 espectadors, lo que lo convirtió en un d'os mas grans d'a Hispania romana.

Caracteristicas tecnicas

A o contrario que atros teatros, que emplegoron desnivels en o terreno, l'edificio se construyió en terreno plan emplegando opus caementicium, a imitación d'o Teatro de Marcelo de Roma, con una estructura de aniellos concentricos y muros radials entre éls que se disposan formando una cavea u gradas que fuoron recubiertas por losas de mármol, igual que a orchestra.

A frontera fue decorata con piedras picatas d'opus quadratum, presentando una altaria a l'exterior de tres pisos y ventidós metros. Poseyeba un singular acceso independient desde a puerta central d'a frontera dica a orchestra de trazato perpendicular a las tablas u escena y que recorreba como un eixe o teatro ta uso d'as autoridaz, que accedeban asinas dreitament a os escanyos reservatos a éls en o semicerclo orquestal. Iste exclusivo acceso se puet observar tamién en os teatros de Torino u Minturno —encara que ye unico entre os d'a Hispania romana— y puet deber-se a la variedat de espectaclos, no nomás dramaticos, que se i celebraban.

Transformación y redescubrimiento A suya decadencia prencipió en o sieglo III, cuan se i prenioron piedras para recreixer as murallas y atras edificacions, que nomás deixoron o formigón romano d'a estructura que se i puet veyer actualment.

Con o tiempo remató por estar cubierto por atras edificacions dica a decada d'os anyos setenta d'o sieglo XX, en que excavacions lo sacoron atra vegata a la luz. Dimpués d'o suyo redescubrimento, ha estato acondicionato ta estar vesitato, albergando un museu que amuestra y explica os trobos arqueolochicos descubiertos.

A traviés d'unas pasarelas os vesitants pueden veyer as restas d'as gradas y o escenario que han estato protechitos por una gran cubierta traslucida de policarbonato. Chunto a las restas arqueolochicas s'ha rehabilitato un edificio, ta albergar o Centro d'Interpretación a on que se introduce a o vesitant a la historia d'o teatro y a os cheneros dramaticos, vida social y politica d'a epoca.

Se veiga tamién Museu d'o Teatro de Caesaraugusta Historia de Zaragoza Molimentos romanos de Zaragoza

Referencias

Bibliografía Beltrán Lloris, Miguel y Guillermo Fatás Cabeza, Historia de Zaragoza, vol. 2. César Augusta, ciudad romana, Zaragoza, Ayto. de Zaragoza - Caja de Ahorros de la Inmaculada, 1998, págs. 47-48. .

Vinclos externos

Francisco de A. Escudero y María Pilar Galve, «El teatro de Caesaraugusta». Cap. VII del catálogo de la exposición El Teatro Romano celebrada en La Lonja de Zaragoza (abril-junio de 2003) organizada por Ayto. de Zaragoza y Fundación "La Caixa". Versión digital en www.almendron.com o Documento con fotografías y datos del museo Reconstrucción virtual. Teatro romano en la página web del Ayuntamiento de Zaragoza Museo del teatro de Caesar Augusta. Información y gráficos. Miguel Beltrán Lloris, «El teatro de Caesaraugusta. Estado actual de conocimiento», en Teatros romanos de Hispania. Cuadernos de arquitectura romana, vol. 2, 1993, págs. 93-118. Francisco de Asís Escudero y María Pilar Galve, «Edificios de espectáculos», eh Francisco Beltrán Lloris et al., Zaragoza: Colonia Caesar Augusta, L'erma di Bretschneider, 2007, vol. 4, págs. 57-70. ISBN 9788882653989.

Categoría:Biens d'Intrés Cultural d'a Comarca Central Categoría:Molimentos de Zaragoza Categoría:Zaragoza romana Categoría:Molimentos d'a Hispania romana