Josef Mengele (, dito l'Ánchel d'a Muerte, Todesengel en alemán, naixito de Günzburg (Reino de Bavera, Imperio Alemán, hue en Bavera, Alemanya) o 16 de marzo de 1911 y muerto en Bertioga (Estau de São Paulo, Brasil) o 7 de febrero de 1979, estió un medico y criminal de guerra alemán, miembro d'as Schutzstaffel qui mientres o Tercer Reich y a Segunda Guerra Mundial prenió parte activa en l'Holocausto y en as mortaleras feitas por os nazis contra muitas atras chents, amás d'os chudieus.
Doctorato en Medicina por a Universidat de Frankfurt d'o Main, y en Antropolochía por a Universidat de Múnich, fue destinato en o campo d'exterminio d'Auschwitz-Birkenau, fendo en primeras a selección d'os destinatos a morir inmediatament y d'os destinatos a estar explotatos en condicions d'esclavitut dica o suyo extermino definitivo, t'adedicar-se dimpués a practicas pseudo-medicas infamants con toz os presoners, incluyindo-ie os ninos, motivo por o cual recibió a suya embotata de l'Ánchel d'a Muerte. D'antis mas heba partecipato en a luita en o Frent Oriental en una división d'as Waffen-SS.
Cuan remató a guerra con a redota nazi, prencipió por amagar-se en a mesma Alemanya d'a postguerra, ta dimpués marchar enta America d'o Sud, a on vivió d'incognito dica a suya muerte. Morió afogato mientres nadaba en una playa de Brasil en l'anyo 1979, fue apedecato con nombre falso dica l'anyo 1985 en que fue exhumato y identificato con muestras d'ADN comparatas con os d'a suya mai i fillo.
Vinclos externos
Categoría:Medicos d'Alemanya Categoría:Militars d'Alemanya d'a Segunda Guerra Mundial Categoría:Muertos en o estau de São Paulo Categoría:Naixius de Bavera Categoría:Nazismo Categoría:1911 (naixencias) Categoría:1979 (muertes)