Pere Bosch Gimpera u Pere Bosch i Gimpera (tamién gosa trobar-se como Pere Bosch-Gimpera u castellanizato como Pedro Bosch Gimpera), naixito de Barcelona (Barcelonés) o 22 de marzo de 1891 y muerto en Ciudat de Mexico (Mexico) o 9 d'octubre de 1974, estió un historiador, prehistoriador y catedratico catalán, refuchiato en Mexico en rematar a Guerra Civil espanyola adquirindo-ne ixa nacionalidat en 1971.
Formato academicament en a Universidat de Barcelona, enampló estudios en Berlín, convertindo-se en una destacata fegura en o campo d'a Prehistoria d'a peninsula iberica. Catedratico d'ixa especialidat dende 1916 en a Universidat de Barcelona, se convertió en o primer rector d'a Universidat Autonoma de Barcelona o 18 de chulio de 1933.
Antiparte, partidario d'o nacionalismo catalán y militant d'Acció Catalana, estió engarcholato en 1934 por as suyas actividaz nacionalistas, y en a Guerra Civil, mientres o Gubierno de Lluís Companys (1937-1939) estió Consellero de Chusticia d'a Cheneralidat de Catalunya.
Dende a nueva Universidat de Barcelona controlata por o franquismo s'organizó contra él una campanya de desprestichio, pero en l'exilio estió profesor en a Universidad Nacional Autónoma de México, amás de chefe d'a División de Filosofía y Humanidaz d'a UNESCO.
Obras 1913: El problema de la cerámica ibérica. 1914: Grecia y la civilización crético-micénica. 1919: Prehistòria catalana. 1920: La arqueología preromana hispánica. 1926: Historia de Oriente. 1934: Etnologia de la península ibèrica. 1945: El poblamiento antiguo y la formación de los pueblos de España. 1960: El problema indoeuropeo. 1960: Cataluña, Castilla, España. 1974: Paleontología de la península Ibérica.
Categoría:Catedraticos de Catalunya Categoría:Exiliaus d'o franquismo Categoría:Historiadors de Catalunya Categoría:Muertos en Ciudat de Mexico Categoría:Naixius de Barcelona Categoría:Prehistoriadors de Catalunya Categoría:1891 (naixencias) Categoría:1974 (muertes)