Os adverbios espacials en aragonés son d'orichen latín y prenen formas pareixidas a como son en idiomas mugants. A part d'os adverbios espacials deicticos aquí, astí, allí u allá, bi n'ha d'atros, muitos d'éls distribuitos en parellas d'oposaus, que pueden ir acompanyaus de preposicions.
Adverbios espacials deicticos
Son aquí, astí y allí, allá.
Adverbios pa expresar distancia relativa A cercanía la expresan os adverbios cerca u amán y a leixanía la expresan os adverbios luent u leixos.
A forma amán se fa servir muito en aragonés escrito pero no se fa servir guaire en aragonés charrau, u por o menos no tanto como o verbo amanar con o que ye relacionau. O significau de cerca ye mes amplo que no lo significau de amán.
A forma luent (pronunciau /luén/) se rechistra unicament en Chasa, Francho Nagore et al. Endize de bocables de l'aragonés. Instituto de Estudios Altoaragoneses, Uesca 1999. pero se troba muito en textos medievals y se suposa que deriva d'o latín LONTE como unas cuantas parolas d'a suya familia (lonteza y alontar). En benasqués se diz lluen José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico, 2003 p 200 y encara se documenta llun en bel texto grausín d'o sieglo XX, Vicente de Vera, Eduardo: Textos en grausino (1904-1985). Zaragoza, Deputación Cheneral d'Aragón (col. «O pan de casa nuestra», 3), 1986. p 97 tot en continación cheografica con o catalán lluny (pronunciau llun en muitos puestos), que se suposa que provién d'o latín LONGE. Ye posible que en aragonés haigan puesto convercher as evolucions d'o latín LONTE y LONGE. Leixos se documenta en belsetán y tellano. Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010. pp 121-122, p 245
Pa expresar una lonteza gran tenemos l'adverbio dillá, posiblement relacionau con o catalán enllà, l'occitán enlà y o francés delà. Chabier Tomás Arias: El aragonés del Biello Sobrarbe. Instituto de Estudios Altoaragoneses (1999). Se proposa una etimolochía a partir d'o latín DE ILLAC.
Adverbios pa expresar inclusión u exclusión espacial A inclusión en un espacio determinau la expresa l'adverbio adintro, con diferents variants, a exclusión respecto a un espacio determinau la expresa l'adverbio afuera u difuera.
Adverbios pa expresar posicions en a verticalidat As posicions verticals altas s'expresan con os adverbio (d)alto y (d)encima, as posicions baixas con abaixo y debaixo. As formas (d)encima y debaixo fan referencia a ser chusto en a part superior u a part inferior d'un plan imachinario horizontal respectivament.
En aragonés ribagorzano tenemos l'adverbio dichós u dechós como resto de l'adverbio d'uso medieval chus(o), indicador d'inferioridat vertical, en oposición a sus(o), indicador de superioridat vertical y que no se conserva en garra parla altoaragonesa actual.
Adverbios pa expresar posicions en a horizontalidat Tenemos arredol, enfrent y parella d'oposaus debant-dezaga, toz con as suyas variants. Arredol indica posicions en totas direccions en relación a un punto imachinario central. Presenta como variant alredol. Enfrent indica una posición en un mismo plan horizontal que atra pero enfilada en sentiu diferent a l'obchecto que se'n parla. Debant se refiere a una posición horizontal respecto a un obchecto en o mesmo costau que l'observador, dezaga se refiere a una posición horizontal respecto a un obchecto en un costau diferent a l'observador. Ye un d'os pocos adverbios d'orichen arabe en aragonés.
O relativo (a) on como adverbio espacial A parola a on (con as suyas variants), ye un pronombre relativo que deriva d'o latín ŬNDE con o posible acompanyamiento d'a preposición a y puede prener una función d'adverbio visible por eixemplo en: ande habeba que actuar. dende allí t'ande fue. por ande se fica l'augua. no son como las uellas que las fas rodar t'an quieres.
As diferents variants de a on son: On(e), en aragonés ribagorzano. Agón, en benasqués con una epentesi antihiatica por fonetica sintactica a partir de a on. An, s'explica por aglutinación d'a preposición a con on: a+on > aon > an. Ande y Onde s'explicarían por converchencia con o castellano de rechistro vulgar, on son presents estas formas, consideradas vulgarismos de donde y adonde.
L'adverbio a on (y as suyas variants) puet ir acompanyau d'o relativo que indicando millor a suya valura relativa, y servindo pa dar enfasi. Encara que ye bien documentau en belsetán Lozano, Ch., Saludas, Á.L.: (2005). Aspectos morfosintácticos del belsetán. Zaragoza: Gara d'Edizions - IFC, p 72., tamién se documenta en Gavín, Sobrepuerto, Val de Tella, Viello Sobrarbe, Val de Chistau y Val de Benás: Lleva-la t'an que yera (aragonés d'a Valle de Tella). Ande que se coceba o pan (aragonés d'o Viello Sobrarbe). T'an que quero (benasqués).
Referencias
Bibliografía Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico, 2010. José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico. Chabier Tomás Arias: El aragonés del Biello Sobrarbe. Instituto de Estudios Altoaragoneses, (1999).
Espacials Aragones