O superstrato eslau en rumano consiste en a presencia en l'idioma rumano de ciertos elementos propios d'as luengas eslavas en esta luenga neolatina. Os elementos eslaus son sobre tot lexicos, pero tamién se manifiestan en forma de sufixos d'orichen eslau, calcos semanticos a partir de locucions eslavas, palabras con components d'orichen mixto y de l'adaptación de modelos sintacticos eslaus. L'adaptación d'as palabras eslavas en rumano presenta aspectos comparables a l'adaptación d'os elementos chermanicos en aragonés y luengas neolatinas de l'arredol.

Os elementos eslaus se remontan a diferents etapas d'a historia d'os vlacos, dende tiempos alto-medievals d'expansión d'os pueblos eslaus dica periodos recients d'influencia de l'Imperio Ruso y dimpués a URSS en Rumanía y especialment en Besarabia, dimpués Republica Moldava. Os primers elementos eslaus presents en o rumano son por un regular propios d'a branca eslava d'os idiomas bulgaro y lo macedonyo.

Destacan os termins relacionaus con l'agricultura y tamién os termins ampraus d'a variant meridional d'o eslau eclesiastico (limba slavonă u slavona bisericească en rumano), que estió la luenga liturchica d'os vlacos en Moldavia, Vlaquia y Transilvania dica fa pocos sieglos, por estar ortodoxos. Una d'as denominacions d'o eslau eclesiastico en bulgaro ye tserkovno-slavianski balgarski-volokhski iazyk (literalment luenga eslava d'iglesia bulgara-vlaca).

A importancia relativa d'o lexico eslau ye obchecto de discrepancia, y dificil d'evaluar, sobretot cuan en o periodo d'entreguerras muitas palabras eslavas han estato substituyidas por equivalents franceses, italianos u latinos, (relatinización).

Palabras eslavas que s'emplegan muito en rumano son: da ("sí", afirmación), bici ("zurriago"), bârlog ("escondrillo", "amagadero" d'un animal gran), castravete ("pepín"), cofă ("pozal de fusta d'abet"), dragoste ("amor"), glas ("voz", "trino"), horn ("chaminera"), iubire ("amor"), pustiu ("disierto", como adchectivo), pustie ("disierto", como sustantivo), ţintă ("blanco a on lanzar", "diana", "obchectivo"), a azvârli ("lanzar", "chitar", "arrullar"). Maria Boatcă, Silvestru Boatcă y Marcel Crihană: Gramatica limbii române explicată şi cu exerciţii Edit-construct 2000.

Lexico eslau Terminolochía agricola 200px|thumb|right|A fafanoria se dice en rumano morcov. Os nombres d'as plantas cautivadas, a verdura, as hortalicias, fruitas, árbols fruitals, y as ferramientas agricolas gosan estar d'orichen eslau. Esto puet evidenciar que as invasions barbaras que conducioron a la cayida de l'Imperio Romano desconchuntoron a sociedat agraria y farían desapareixer o modo de vida d'os agricultors sedentarios en as tierras planas, permaneixendo o modo de vida d'os pastors transhumants, que mantenioron a luenga nativa, como s'ha deveniu con os persas en tiempos d'a invasión mongola u con determinadas sociedaz berbers transhumants aisladas entre zonas arabofonas. Cuan os vlacos de cultura orichinariament pastoril tornoron a ocupar as tierras planas prenioron a denominación d'os cautivos d'os idiomas eslaus.

Entre as plantas cautivadas que prenen nombre d'as luengas eslavas tenemos castravete ("pepín"), morcov ("zafanoria"), bob, ("simient", "faba"), etcetera.

Interesant ye a palabra măslină, d'orichen eslau present tanto en croata como en ucrainés (pero en ucrainés se refiere a las olivas negras).

Entre as ferramientas agricolas tenemos plug ("aladro").

Terminolochía ligada a l'orache y medio fisico 200px|thumb|right|A "nieu" se diz zăpadă en rumano. A mesma palabra pa dicir "orache" ye tipicament eslava: vreme. As palabras eslavas ligadas a l'orache son en linia con as palabras d'atros campos lexicos ligadas a los cambios d'estau, y destacan a topi ("revenir", "regalar", "fundir"), zăpadă ("nieu"), zori ("alba", pero se prefiere usar en o estándard a palabra latina auroră), ceas ("tiempo").

Palabras eslavas relativas a lo medio fisico son nisip ("arena") y noroi ("buro").

Fauna y flora 200px|thumb|right|O "esquiruelo" se diz veveriţă en rumano, como si fuese un can de ponto chicot. Ciertos zoonimos y fitonimos son d'orichen eslau. Entre os zoonimos destacan veveriţă ("esquiruelo", pero a radiz tien un orichen relacionau con un radedor ya desapareixiu d'as nuestras tierras, o can de ponto), y râs (o "gato cerval boreal"), tamién cierto lexico relacionau con os animals y a caza como bârlog ("amagadero", "escondrillo", especialment aplicau a lo de l'onso). Entre os fitonimos tenemos hreniţă < хрен ("berro").

Terminolochía comercial Destaca a plăti ("pagar", "bosar"), târg u târgu ("mercau", "mercadal", "plaza", "feria"), rând ("fila"), sticlă ("veire" y "botella"), bogat ("rico"), bogăţie ("riqueza"), etcetera.

Terminolochía marinera A terminolochía marinera ye eslava cuasi de tot: corabie ("barco"), lotcă ("bote"), ostrov ("isla"), vasla ("remo").

Títols, autoridaz y rans socials 200px|thumb|right|Vlad II Dracul, o voievod de Vlaquia entre 1436 y 1442 y entre 1443 y 1447. O rumano prene d'as luengas eslavas tota una serie de termins que fan referencia a autoridaz y a títols y rans d'a nobleza medieval: jupân, boier, cneaz, rob, slugă, a sluji, etcetera.

Destaca gospodar ("terratenient", "casero", "patrón", "amo", "cherent"), relacionau con o господар en bulgaro, serbocroata y ucrainés, y voievod.

Terminolochía cristiana 200px|thumb|right|Sant Andreu o santo patrón u hram de Rumanía. O eslau eclesiastico yera a luenga liturchica d'os vlacos en Moldavia, Vlaquia y Transilvania, que yeran ortodoxos. Igual como esdevién con l'aragonés y la luenga liturchica latina u o latín medieval arromanzau, as primeras muestras escritas d'idioma rumano son conchuntos de palabras rumanas en meyo de textos en eslau eclesiastico.

Una d'as palabras mes claras d'esta conchunto ye Isus ("Chesucristo").

A part de palabras concretas os vlacos facioron calcos u adaptacions de palabras eslavas de l'ambito d'a relichión cristiana. D'esta traza душа se copió como suflet con o sentiu d'alma y a palabra patrimonial inimă prenió lo significau de "corazón".

Atras palabras d'o lexico cristiano ortodoxo, d'a vida relichiosa u a mistica son: a izbăvi < избавить "liberar", veşnic < вечный "perén, pa cutio", sfânt < святой "santo", a sluji < служить "servir", amvon < омовение "predicadera", rai < рай "paradiso", iad < ад "infierno", proroc < пророк "profeta", hram < храм "santo patrón", duhovnic < духовник "confesor", dihanie < дыхание "bestia salvache, monstruo".

Toponimia eslava 250px|thumb|Anviesta de Cernavodă, localidat d'o sud-este de Rumanía con un toponimo transparent en eslau: "escura augua". Os elementos lingüisticos eslaus son muito evidents en Rumanía y Republica Moldava. Encara que Dacia estió un nuclio d'influencia romana con ciudaz y vida urbana, os habitants romanizaus d'estas ciudaz las abandonoron cuan se produciban as invasions que acompanyaban a la a cayida de l'Imperio Romano y prenioron un modo de vida transhumant en os Carpatos y a suya redolada. Como consecuencia d'ixo cuasi que no sobrevivioron os toponimos orichinals d'as ciudaz en latín u romanz. Os nuevos nuclios grans de población estioron fundacions u refundacions d'una población on os eslaus (u bulgaros asociaus a eslaus) yeran a clase dirichent, u por o menos o eslau yera a luenga d'a cultura y d'os liders relichiosos, y d'esta traza tenemos os toponimos Cernavodă, Prilog, Dumbrava, Bistriţa, Talna, Rus, Bistra, Glod, Ruscova, Straja, Putna, Hulub, Bâc, Tecuci, Potcoava, Corabia, Lipova, Holod, Topila, Ostrovu.

En Transilvania o proceso de formación de toponimos eslaus s'aturó con l'arribada d'os hongaros y a progresiva ocupación d'o territorio.

Adchectivos y participios adchectivaus con component eslau Bi ha una gran presencia d'adchectivos d'orichen eslau y de participios adchectivaus provinients de verbos eslaus, constituindo una important napa lexica.

Entre os adchectivos tenemos slab ("labrenyo", "feble"), drag ("aimau"), bolnav ("malauto"), prost ("meco"), drăgúţ ("adorable", "encantador"), milostiv ("compasivo"), etcetera.

Bi ha tota una serie d'adchectivos con o sufixo -ic: jalnic ("triste", "pesimista", "un agonías"), darnic ("cheneroso"), zadarnic ("fracasau"), vrednic ("dilichent", "laborioso"), obraznic ("descarau", "insolent"), voinic ("valient"), groaznic ("horrible", "temible"), harnic ("treballador"), straşnic ("marabilloso", "tremendo", "collonuto"), mucenic, etcetera.

Entre os participios adchectivaus cinstit ("honesto"), iscusit ("templau", "hábil"), iubit ("aimau"), etcetera.

Fonetica d'os eslavismos Os eslavismos s'adaptoron foneticament a lo rumano, y d'esta traza: Ohileti > a ofili ("marcir-se" con una curiosa adaptación de l'aspirada eslava "h" comparable a como l'aragonés adapta arabismos con "f" como Alfambra, Alfama, etcetera). Ljubiti> a iubi ("aimar"). Protiva > potrivă Podkova > potcoavă ("ferradura").

Un feito curioso ye a presencia d'una aspirada en ampres eslaus diferents de a ofili como hram ("santo patrón"), hrană ("alimento"), hulubărie, hrean, contrastando con as palabras patrimonials d'orichen latino que la heban perdida ya en tiempos d'o latín balcanico, tal y quiento veyemos en iarnă ("hibierno").

Os eslavismos no gosan presentar belunas d'as evolucions foneticas que conducioron a la formación de palabras patrimonials dende o latín. Manimenos eslavismos antigos como râna, stâna, stăpân, jupân y smântână si que presentan a lochica â de palabras patrimonials.

Morfolochía d'os eslavismos Bels verbos d'orichen eslau se conchugan d'alcuerdo con a variant incoativa d'a cuatrena conchugación, de verbos remataus en -i, a la que quedan adhibius. O caso de a iubi ("aimar") en ye en eixemplo.,Heinrich Lausberg "Lingüistica romanica. Tomo II Morfología" Editorial Gredos. atros eixemplos son verbos que indican cambios d'estau como a găsi ("trobar"), a goni ("repuyar"), a hrani ("alimentar", "nutrir"), a lovi ("pegar"), a ofili ("marcir"), a topi ("revenir", "regalar", "fundir"), a trezi ("despertar-se", "alzar-se"), a pomeni ("mencionar"), etcetera...

Coincide en ixo con o tractamiento que siguen ciertos verbos d'orichen francico chermanico en francés como choissir, y tamién con ciertos latinismos como fini y servir que s'adhiben a esta variant incoativa d'a cuatrena conchugación tanto en rumano como en idiomas galorromances (os casos de finir, servir, punir), y dica en aragonés medieval (en os casos de finir y punir).

Cambios semanticos Muitos ampres eslaus cambioron o suyo significau orichinal una vegada cheneralizaus en rumano, y d'esta traza. гасить (extinguir) > a găsi "trobar". ловить (agarrar, agafar) > a lovi "pegar a belún". клепание (movimiento ritmico) > clipă ("inte", "moment").

Sufixos y prefixos eslaus Destaca a presencia d'o prefixo răz ("atra vegada"), ne- ("no", "ni") y d'os sufixos -ac, -că, -aci, -eală, -nic, -an, -işte y -iţă. Os sufixos -iţă y -ică son importants marcadors d'o chenero feminín en rumano, mesmo en elementos d'orichen latino y ampres de luengas occidentals, (spaniolaica, lupoaica, vampiroaica).

O prefixo ne- se veye en nebun ("barrenau", "loco"), necredincios, nerabdare. O prefixo răz-: se veye en război, ("guerra"), razbunare ("venganza", "revancha"), răsuci, răzgândi, răsculat, răscopt, răztalmacit. O sufixo -ac se veye en sarac ("pobre"). O sufixo -că se veye en fiică ("filla", comparable a lo eslau дочка). O sufixo -nic se veye en intuneric ("escuro"), y ye un important formador d'adchectivos d'orichen eslau: jalnic ("triste", "pesimista", "un agonías"), darnic ("cheneroso"), zadarnic ("fracasau"), vrednic ("dilichent", "laborioso"), obraznic ("descarau", "insolent"), voinic ("valient"), groaznic ("horrible", "temible"), harnic ("treballador"), straşnic ("marabilloso", "tremendo", "collonuto"), mucenic, etcetera.