L'Instituto de Estudios Altoaragoneses (en aragonés Instituto d'Estudios Altoaragoneses; por as suyas siglas IEA) ye una institución cultural aragonesa que tien como finalidat d'estudiar y publicar estudios sobre l'Alto Aragón. Actualment y dende 1977 ye adscrito a la Deputación Provincial de Uesca con o suyo nombre actual, pero cuan s'establió en 1949 teneba o nombre d'Instituto de Estudios Oscenses (en aragonés Instituto d'Estudios Uescanos) y yera una institución independient de cualsiquier vinclo con l'Administración publica. Os suyos establidors estioron Virgilio Valenzuela Foved, Ricardo del Arco, Salvador María de Ayerbe, Miquel Dolç, Antonio Durán Gudiol y Federico Balaguer.
Actualment fa parte d'a Confederación Española de Centros de Estudios Locales, relacionando-se con o Consejo Superior de Investigaciones Científicas y tien a suya seu social en a ciudat de Uesca, encara que tamién conta con subdelegacions u subcentros en bellas comarcas altoaragonesas. O suyo actual director ye Alberto Sabio Alcutén, estando-ne o suyo subdirector Francho Nagore.
Amás de publicar libros, l'IEA tamién fa publicacions periodicas como a revista Argensola, sobre Historia y Ciencias Socials; a revista Alazet sobre Filolochía; a revista Lucas Mallada, sobre Ciencia; u a revista Bolskan sobre Arqueolochía. Fa las suyas publicacions en as tres luengas d'Aragón: aragonés, castellano y catalán.
Lista de directors de l'IEA 1949-1978: Virgilio Valenzuela Foved. 1978-1981: Cecilio Serena. 1985-1989: Agustín Ubieto Arteta. 1990-1992: José Ramón López Pardo. 1992-1994: Antonio Durán Gudiol. 1995-2000: Bizén d'o Río. 2000-2020: Fernando Alvira Banzo. 2020-hue: Alberto Sabio Alcutén.
Vinclos externos Sitio web oficial de l'Instituto de Estudios Altoaragoneses.
Categoría:Cultura d'Aragón Categoría:Provincia de Uesca Categoría:Institutos d'investigación d'Aragón