Idioma bosnio (en bosnio bosanski jezik) ye a denominación que recibe oficialment a variant estandardizada d'o continuum dialectal serbocroata que fan servir os bosnios en Bosnia y Herzegovina, Serbia, Montenegro, Croacia y atros estaus mugants. Ye a luenga oficial de Bosnia y Herzegovina.
O estándard bosnio se basa sobre tot en a parla d'Herzegovina, que fa part d'o dialecto xtokavisco, igual como os estándards d'as "lenguas" croata, montenegrina y serbia, tamién denominacions locals de variants estandardizadas d'o serbocroata. Muitos d'os parlants nativos no son comodos con a denominación "serbocroata" y prefieren as denominacions relativas a las nacionalidaz a las que perteneixen.
L'idioma bosnio ye una luenga eslava meridional que s'escribe en alfabeto latino, encara que tamién s'admite a suya escritura en alfabeto cerilico. En a Bosnia Otomana se fació servir l'alfabeto arabico pa escribir as parlas xtokaviscas locals, precursoras d'as que charran os bosnios, pero tamién d'as que charran os croatas y os serbios de Bosnia y Herzegovina. Manimenos esta literatura alchamiada eslava estió escasa.
O lexico bosnio presenta muitos arabismos, turquismos y persismos, que fuoron ampraus en tiempos d'os otomans. Este lexico relacionau con culturas islamicas diferencia o bosnio d'as atras variants estandardizadas d'o serbocroata, y tamién lo diferencian d'os dialectos serbocroatas de fuera de Bosnia y Herzegovina.
Referencias
*