Memoria de un montañés (por o suyo títol orichinal) ye o libro de memorias de José Satué Buisán, «Ferrer», o pai d'o escritor José Mª Satué y un d'os zaguers amos de casa en encetar o camin d'a emigración dende Escartín, en o Sobrepuerto. Por ixo, o libro constituye un testimonio interesantismo sobre o fenomeno d'a despoblación en l'Alto Aragón, y aporta una visión en primera persona sobre a vida y as actividaz tradicionals en as sierras interiors.

O libro ye, en realidat, a versión aprestada y revisada por su fillo, y editada por Xordica Editorial ta o publico, d'as memorias manuscritas por l'autor. A obra ye escrita en castellano, pero a edición respecta toda la cantidat de lexico propio de l'aragonés que l'autor i emplegó en a redacción orichinal, mirando de dar-le fidelidat a la forma natural con a cual él s'expresaba.

Biografía

Sinyó José Satué naixió de casa Ferrer d'Escartín en 1907, y creixó, casó y vevió en o lugar dica 1967, cuan teneba 60 anyos. Su muller tamién yera de Sobrepuerto, d'Otal, por lo que as relacions socials y familiars s'heban desarrollau siempre entre o cabo alto de Sobrepuerto y os lugars mas amanaus en a valle de l'Ara. As ferias de ganau en Broto y en Biescas, a mili, y bella excursión ocasional ta o Sarrablo u ta Nabal (pa comprar os famosos «boticos» d'alfar d'astí) formarán a suya visión d'o mundo a mas gran parte d'a suya vida.

Teneba chirmanos que heban marchau de lugar antes que él, y le contaban as comodidaz de a ciudat, y fillos que marchón pa estudiar y nunca no i quison tornar. Atras casas vicinas heban iu vuedando-se, y os vecinos emigraus le calentaban a cabeza con una vida millor. A vida en Escartín yera dura. Se penaba pa tot. Pero a decisión yera muit difícil y a pospuso mientres que pudo; manimenos, heba de plegar-le o día a-on que s'habría de rendir a la evidencia.

A ixa inusual edat, sexachenero, encieta o camín d'a emigración que l'ha de levar ta Uesca, carriando a su mai anciana, su muller y a sola filla que, choveneta, no heba marchau encara de casa, y baixando por o sender d'o lugar os trastes de casa, a tornas y penando, sobre os mastos que dimpuesas venderá en Fiscal. En ixas envueltas, ni Bergua no teneba pista, y un camín de tan pocos kilometros como bi ha entre Escartín y Fiscal, por aquellas sendas y cargaus, se puede fer una Odiseya.

A luz electrica, l'augua corrient, una cocineta economica... tot le ye curioso y le truca l'atención cuan arriba ta o piset en Uesca. En a ciudat encara treballará bels anyos mas, dica que mas por os fillos que por él mesmo, le descubrirán que existe una cosa que en dicen a chubilación. A versátil y sufierta mentalidat d'un «montanyés», pa quí toz es oficios es sabeba fer (dende ferrar a retellar, dende fer lenya a cazar u ir pastor), pareix que le fa de mas mal adaptar-se a la vida en a Ciudat de zaguerías d'os anyos 60 de cómo s'heba él pensau. Como razona Sinyó Ferrer, puede estar que un árbol viello trasplantau no torne a enradigar.

Se veiga tamién

Sobrepuerto. Qué feban dinantes en un lugar d'o cobalto d'Aragón?. Ainielle, la memoria amarilla. Enrique Satué, sobrino de l'autor.

Categoría:Autobiografías Categoría:Libros de 2007 Categoría:Libros en castellano