Waikato (pronunciau en anglés /'waɪkɑːtɔː/ u /'|waɪkætoʊ/) ye una rechión d'a Isla d'o Norte de Nueva Zelanda. Cubre as zonas de Waikato, Hauraki, peninsula de Coromandel, norte de King Country, gran parti d'o districto de Taupo y partis d'o districto de Rotorua. Ye gubernada por o Consello Rechional de Waikato. En anglés se fa referencia a ella por un regular fendo servir l'articlo determinau: the Waikato.
A rechión va dende a peninsula de Coromandel en o norte, dica o semontano nortoriental d'o mont Ruapehu a o sud y s'estendilla en a Isla d'o Norte dende a costa ueste, a traviés de Waikato y Hauraki dica a peninsula de Coromandel en a costa este. Alto u baixo, a extensión d'a rechion ye a compleganza d'o río Waikato. Atras cuencas que se troban en ista rechión son as d'os ríos Waihou, o Piako, o Awakino y o Mokau. A rechión muga con a rechión d'Auckland a o norte, a rechión d'a Badía de Plenty a l'este, a rechión d'a Badía de Hawke a o sud-este y as rechions de Manawatu-Wanganui y Taranaki a o sud. A rechión de Waikato ye a cuarta rechión mas gran d'o país en aria y población: a suya aria ye de 25.000 km² y a suya población de 449.200 habitants.
A rechión incluye parti u a totalidat d'once autoridaz territorials, mas que cualsiquier atra rechión de Nueva Zelanda. Se centra en l'aria de Waikato que consiste en o districto de Waikato, o districto de Matamata-Piako, o districto de Waipa, o districto de South Waikato y a ciudat de Hamilton. En orden descendent d'aria as once autoridaz territorials son o districto de Taupo (parti), o districto de Waitomo (parti), o districto de Waikato, o districto de Thames-Coromandel, o districto d'Otorohanga, o districto de South Waikato, o districto de Matamata-Piako, o districto de Waipa, o districto de Hauraki, o districto de Rotorua (parti) y a ciudat de Hamilton.
O nombre d'a rechión se prene d'o río Waikato; estando waikato una parola tradicional maorí que puet traducir-se como "augua que fluye" (especificament, wai = "augua" y kato = "o fluxo d'a corrient d'o río enta a mar").
Referencias
Se veiga tamién Rechions de Nueva Zelanda
Waikato