A foz d'o Kawarau (en anglés Kawarau Gorge) ye una foz situada en Otago Central, en a Isla d'o Sud de Nueva Zelanda. O río Kawarau fluye a traviés d'a foz, que se troba entre as localidaz de Queenstown y Cromwell y parti d'a Carretera Estatal 6 que tamién sigue a foz.
A foz prencipia a bels 30 kilometros de Queenstown, amán d'a localidat vinicola de Gibbston y a gran formación rocosa conoixida como Nevis Bluff. Contina bels 25 kilometros antis de que o río entre en a val alta d'o río Clutha amán de l'asentamiento de Ripponvale. A suya gran importancia historica se debe a que o Kawarau estió escenario d'una gran actividat menera mientres a fiebre de l'oro d'Otago d'a decada de 1860, feito por o que encara se i troban bellas bordas d'os meners d'ixas envueltas (mas que mas perteneixients a immigrants chineses) que pueden veyer-se a cantos d'o río. As centrals hidroelectricas de Roaring Meg y os chacimientos d'oro de Goldfields Mining Centre se troban en a foz. Os vesitants encara pueden experimentar en l'actualidat como yera d'antis mas o treballo de buscar oro en o Goldfields Mining Centre.
A foz destaca por a suya polideza natural y ye puesto de practica d'esportes extremos, mas que mas puenting en o puent penchau d'a foz d'o Kawarau y esportes d'augua como o kayak y o hydrospeed.
Debiu a un accident en 2004, doscientos litros de acido clorhidrico se vertioron a la foz, l'acido malmetió a carretera, encara que no causó danyos medioambientals. Tres soldaus de l'exercito de Nueva Zelanda morioron cayendo con un vehiclo Unimog 100 m dende l'alto d'a foz enta o río, cuan feban maniobras en 2005.
A foz ye una d'as dos arias conoixidas a on s'ha puesto trobar en o país o fongo Cerius otagensis que ye en periglo d'extinción y endemico de Nueva Zelanda.
Se veiga tamién Puent penchau d'a foz d'o Kawarau Foz de Cromwell
References
Categoría:Cheografía de Nueva Zelanda Kawarau