A puerta de Toledo yera la puerta ueste d'a muralla de piedra de Zaragoza. Se trobaba chunto a l'actual Mercau Central en a confluyencia entre l'avenida de César Augusto y carrera Manifestación.
Descripción Teneba dos torretons almenaus a cada costau suyo. Un d'ells acubillaba a garchola Reyal dende 1440 (antis situada en a puerta Cinecha) mientres que l'atro yera o puesto a on se trobaba a garchola de Manifestaus, instalada aquí por os deputaus d'o Reino en 1156. Acubilló a o Chusticia d'Aragón, Chuan V de Lanuza, qui en 1591 fue escapezau en a propia plaza.
As suyas puertas yeran de fierro en cuenta de fusta como yera habitual en atras puertas.
Historia Construyida mientres que a epoca romana, estió conoixida como de Beikala, báb al-Qala'ath (en arabe literalment "puerta d'o Castiello") u báb al-Yanud mientres a epoca islamica. Por ixas envueltas se'n iba por aquí enta l'Alchafaría. Con a conquiesta cristiana d'a ciudat en 1118 pasó a denominar-se puerta de Toledo (u en arabe báb Tulaytulah) ya que per allí pasaba lo camín a ixa ciudat. Por iste puesto dentraban en ista epoca as comitivas reyals dende o debantdito palacio ta Zaragoza.
Debant d'a puerta se trobaba a Plaza d'o Mercau, tresladau aquí en o sieglo XII dende a suya antiga ubicación en a puerta Cinecha. Estió asinas o puesto de reunión mas important d'a ciudat mientres os sieglos XVI y XVII, puesto a on no nomás bi heba muita actividat comercial, sino que tamién se i feban torneyos y corridas de toros. Aquí se facioron mientres muitos sieglos as execucions a muerte, decindo-se ta par d'alavez plaza d'o Chusticia.
Fue espaldada en 1842 debiu a que se trobaba en mal estau. Bi ha encara un mural entre as carreras Manifestación y Salduba que remera a ista puerta.
Vinclos externos Puerta de Toledo en o Blog antiguaspuertaszaragoza.wordpress.com
Toledo Categoría:Edificios desapareixius de Zaragoza