O palacio d'os Reis d'Aragón u palacio Reyal de Uesca ye un conchunto d'arquitectura civil situau en a ciudat de Uesca (Aragón) que actualment ye seu d'o museu de Uesca.
Ye declarau Bien d'Intrés Cultural (BIC).
Historia L'edificio orichinal fue construyiu en o sieglo XII ta servir de residencia a os reis d'Aragón, edificau sobre una torre islamica con paramentos en estilo romanico. L'edificio alberga a sala a on se producioron os escaicimientos d'a campana de Uesca y tamién a sala d'a reina Peironela.
A dita Zuda ya existiba en zaguerías d'o sieglo VIII, mientres a dominación musulmana, encara que no s'ha de descartar que existiera astí una posición fuerte anterior. Dimpués d'a conquiesta d'a ciudat por os reis cristianos, se convirtió en residencia d'istos u d'os tenents nombraus por éls; de feito, se sabe que Pero I establió astí una capiella que entregó a l'abat de l'amanau castiello de Mont Aragón.
Dende alavez y con o treslau d'a muga enta o sud, o palacio fue perdindo toda a suya importancia defensiva por lo que s'espaldoron as murallas que protecheban o palacio y as viviendas ocuporon o suyo espacio. En 1611 FelipeIII concedió o palacio a la Universidat Sertoriana de Uesca, que espaldó gran parti, construyindo un nuevo edificio que actualment alberga o Museu de Uesca.
Descripción De l'antigo palacio nomás queda una torre de planta rectangular y coronada con almenas y belatras dependencias vecinas a o Museu y que son emplegadas por iste; o conchunto ye conoixiu como Palacio Reyal.
Amás d'a torre se conserva de l'edificio orichinal o Salón, un espacio rectangular que se transformó en o sieglo XVII suprimindo as distintas plantas que podió tener. En l'actualidat ye cubierto por dos arcadas ochivals d'estilo gotico; en os suyos costaus mayors presenta tres puertas en arco, belunas tapiadas.
En un d'os costaus menors se sitúa a dita Torre d'a Zuda; a la planta baixa s'arriba dimpués de baixar bels escalons baixo una interesant portalada. Ista se troba cubierta por una vuelta de crucería en a que os suyos niérvols descansan sobre una imposta que rodia a sala, mientres que os suyos costaus este y ueste se prolongan en dos absides semicirculars y poseye dos chicotas finestras de meyo punto abocinadas interiorment. En iste espacio se sitúa o escenario d'a lechendaria "Campana de Uesca".
A la planta superior s'accede por una escalera moderna; a sala ye conoixida como de donya Peironela, por estar a on se fació o casorio d'ista con Remón Berenguer IV. Ye un espacio rectangular con a suyas parez adornadas con arquerías ciegas semicirculars, simplas en l'abside y dobles en os trampos rectos, refirmadas en columnas con capitels romanicos. En a sala mas alta, ya desapareixida, debió d'estar a capiella de Sant Nicolau.
O Palacio d'os Reis d'Aragón ye un sobrebuen eixemplo d'o romanico civil de zaguerias d'o sieglo XII.
Bibliografía CASTÁN SARASA, Adolfo. Torres y castillos del Alto Aragón. Huesca: Publicaciones y Ediciones del Alto Aragón, 2004. ESCO SAMPÉRIZ, Carlos. Iconografía de los capiteles de la sala de Doña Petronila del palacio real de Huesca. Argensola. 1979 , nº 87, p. 159-187. GRACIA SENDRA, Dolores; Barcelona, David. Inventario de Castillos de Aragón. Inventario inédito, Gobierno de Aragón. Departamento de Educación, Cultura y Deporte, 2001. GUITART APARICIO, Cristóbal. Castillos de Aragón. Zaragoza: Librería General, 1977. NAVAL MAS, Antonio. Huesca: el desarrollo del trazado urbano y de su arquitectura. Madrid: [s.n.], 1980. NAVAL MAS, Antonio. El urbanismo medieval (siglos XII al XV). Huesca, ciudad fortificada. En LALIENA CORBERA, Carlos. (coord.). Huesca. Historia de una ciudad. 2ª ed. Ayuntamiento de Huesca, 1990.p. 193-215. NAVAL MAS, Antonio; Naval Mas, Joaquín. Inventario artístico de Huesca y su provincia: Partido judicial de Huesca. Madrid: Ministerio de Cultura, 1981.
Vinclos externos
Pachina web d'o Museu de Uesca Museu de Uesca en Patrimonio Cultural d'Aragón «Palacio d'os Reis d'Aragón». Información y imáchens d'a Sala d'a campana.
Categoría:Edificios de Uesca Categoría:Museu de Uesca Categoría:Molimentos de Uesca Categoría:Biens d'Intrés Cultural d'a Plana de Uesca Categoría:Residencias reyals d'Aragón