Blanca de Nápols (Nápols, 1280 - Barcelona, 14 d'octubre de 1310) estió princesa de Nápols y reina consort d'Aragón.
Biografía Filla d'o rei Carlos II de Nápols y d'a suya muller María d'Hongría. En o tractau d'Anagni de 1295 se concertó o suyo matrimonio con o rei Chaime II, matrimonio que se celebró o 29 d'octubre de 1295 en o Monesterio de Santa María de Vilabertrán. Fue una muller de gran relichiosidat que acompanyó a o suyo hombre en numerosas ocasions, mesmo en bellas expedicions militars.
Blanca de Nápols tenió a suya propia Cancellería Reyal. Morió en Barcelona y fue enterrada en o monesterio de Santes Creus.
En aviento de 1835, mientres a Primera Guerra Carlista, tropas gubernamentals integradas por a Lechión Forana Francesa (procedent de Alcheria) y cuantas companyías de migueletes se aloixaron en l'edificio monacal, causando a-saber-los destrozos en o mesmo. As tumbas reyales de Blanca d'Anchú y o suyo mariu fuoron profanadas. Mientres que as restas de Chaime II fuoron cremadas, encara que pareixe que bellas restas remanioron en o sepulcre, la momia d'a reina fue chitada enta un pozo, d'on fue quitada en 1854.
Matrimonio y descendencia Blanca y o rei Chaime tenioron diez fillos: Chaime d'Aragón (1296-1334), que renunció a os suyos dreitos reyals dimpués de casar-se con Alionor de Castiella. Alifonso IV d'Aragón (1299-1336), rei d'Aragón, rei de Valencia y conte de Barcelona. María d'Aragón (1299-1347), casada con Pero de Castiella y, dimpués d'enviudar, moncha en o Monesterio de Santa María de Xixena. Constanza d'Aragón (1300-1327), casada con Don Chuan Manuel. Blanca d'Aragón (c. 1301-1348), moncha y priora en o Monesterio de Santa María de Xixena. Isabel d'Aragón (1302-1330), que casó en 1315 con Frederico I d'Austria. Chuan d'Aragón (1304-1334), arcebispe de Toledo, de Tarragona y patriarca d'Aleixandría. Pero IV de Ribagorza (1305-1381), conte de Ribagorza, de Ampurias y de Prades. Remón Berenguer I d'Ampurias (1308-1364), conte de Prades y sinyor d'a Villa d'Elch. Violant d'Aragón (1310-1353), casada con Felipe, despota de Rumania y fillo de Felipe I de Tarento, y posteriorment con Lope Ferrench de Luna, primer conte de Luna.
Vinclos externos
Categoría:Consorts de monarcas d'Aragón