Os Monts de Castellón (en castellano Montes de Castejón) son un conchunto de monts en a comarca de Cinco Villas, en Aragón, situaus a bels 30 km a o norte de Zaragoza. Levan o nombre d'a localidat de Castellón de Val de Chasa, en o centro d'ista zona montanyosa. Parti d'a sierra se troba declarada Zona d'Especial Protección pa las Aus (ZEPA), por lo que apareixe reflexada en o rechistro europeu d'espacios protechius d'a Rete Natura 2000.
Situación cheografica O cobalto d'a sierra ye o vértiz Esteban (746 m), a on podemos trobar unas instalacions militars. Atras altarias importants son o Guarizo (745 m), Muses (741 m), Pola (688 m), Pinatonar (685 m) u Pogallinero (639 m). Instalaus en o cobalto d'as crenchas superiors podemos trobar aerocheneradors eolicos.
A versant norte d'a sierra que da a la localidat d'Erla se conoixe tamién como sierra d'Erla, u como Mont de Sora en a redolada d'o castiello de Sora.
A serranía que forman istos monts chunto con os Monts de Zuera, son conoixius tamién a vegadas como Muela d'el Castellar. Podríamos decir que a deseparación entre as dos sierras coincidiría con a siguient relación:
Cuadrant nord-este d'a serranía, os propiament ditos Monts de Castellón. Cuadrants Nord-ueste y Sud-ueste d'a serranía, u Monts de Zuera.
A debantdita deseparación d'istas dos sierras, que igualment coincide con a d'os termins municipals d'as dos localidaz, se da en una ralla de bels 9 km d'orientación norte-sud, clarament visible dende cualques zonas amanadas. Por ista crencha descurre o Camin d'o Cerro de Castellón, coincident en bels trampos con a Canyada Reyal d'a Muga de Zuera, dende o parache d'o Cubilar Hondo dica l'Alto de Sant Esteban, puerto de montanya de 700 m d'altaria en a carretera A-1102.
D'atra man os Monts de Castellón tienen atras dos versants a esmentar, la que perteneixe a o termin municipal de Taust, tamién dita localment sierra de Mont Alto, y la que s'orienta enta Zaragoza y arriba dica la zona de Lo Castellar, perteneixient a o municipio d'a ciudat pero ocupau cuasi en a suya totalidat por o Campo de Maniobras militars de Sant Gregorio, centro instructor de l'Exercito de Tierra.
Flora Os Monts de Castellón son cubiertos de vechetación mediterrania, en a suya mayoría constituyida mas que mas de carrasca (Quercus ilex) y pin borde (Pinus halepensis), amás d'eixemplars aislaus d'acirons (Acer campestre y Acer monspessulanum) u caixigos (Quercus faginea), en lo que se refiere o estrato arborio. En o referente a l'arbustivo bi ha coscollos, chinebros, sabinas, retamas y lamials. Conchuntos vechetals que son tipicos d'as sierras amanadas a la depresión d'Ebro, repetius por eixemplo en a sierra d'Alcubierre, Monegros. Ditas formacions son a sobén victimas d'incendios forestals recurrents, mas que mas exposadas mientres a epoca de sequera. O zaguer incendio grieu se dio en verano de 2008, habendo mesmo de desalochar-se o lugar por a cercanía d'as flamas, Desalojados los 300 vecinos de Castejón de Valdejasa cremando 1.700 ha de mont d'o termin municipal Castejón de Valdejasa - Retiran madera quemada del incendio de 2008 y 2.200 en total afectando tamién a os Monts de Zuera. A causa de dito incendio estió un accident en a carretera en a que un vehiclo se salió d'a calzada impactando contra un árbol. O incendio tardó dos días en amortar-se, habendo de desplazar-sen a-saber-los medios civils y militars, como a UME y as BRIF. No bi habió perdidas humanas.
Se pueden trobar cuantos árbols molimentals en istos monts como a Sabina Mateo "La Sabina Mateo" en Castejón de Valdejasa u a Carrasca de Pui Oliva, También Singular de Aragón la Carrasca de Puy Oliva en Castejón de Valdejasa. catalogaus os dos como Árbol Singular d'Aragón.
Feguras de protección Os Monts de Castellón se troban en una serranía d'a que tamién fan parti os Monts de Zuera, y Lo Castellar, en una zona protechida con a fegura de Zona d'Especial Protección pa las Aus denominada "ZEPA Montes de Zuera, Castejón de Valdejasa y El Castellar", tamién adintro d'o Rete Natura 2000. EUNIS - Site factsheet for Montes de Zuera, Castejón de Valdejasa y El Castellar Achencia Europea de Meyo Ambient.
Referencias
Vinclos externos Senders de Cinco Villas Castejón de Valdejasa. Cheografía
Se veiga tamién Monts de Zuera. Lo Castellar.
Categoría:Sierras d'a provincia de Zaragoza Categoría:Sierras d'a depresión d'Ebro Categoría:Sierras de Cinco Villas Categoría:Zonas d'especial protección pa las aus d'Aragón