25px Esta fuella ye escrita en el parlar de la Comuna.
Senyes (oficialment y en castellano Señes) ye un despoblau aragonés de la val de la Comuna, per alto de Sin y de Serveto, que en descomponer-se este municipio l'encluyoron a'l de la villa de la valle vecina de Plan.
El lugar de Senyes se conserva encara drecho, anque l'esfuerzo ta que se i haiga aguantau el fayoron mas que mas es vecinos d'antes que habioron d'emigrar pero que han estau puyando-ie un anyo a l'arreu de l'atro toz estes tiempos, ta mantener y tamién ta arreglar las pocas casas que el componen.
Ta hoi mos n'han llegau caitas bien pocas casas. L'Abadía, que ye como en toz es lugars de Sobrarbe deciban a la casa d'el mosén, ye bien malmesa, y tamién la ilesia que ye cerrada, ya en habe buens anyos.
La pista que i lleva ye un alcurce que amanece dende abaixo, d'an que ye la carretera de Serveto, bels 700 m d'antes d'este lugar cuan se i va dende Sin, y alavez puya per las faixas que bien antes yeran de cultivo, y se mete, tot de tierra, ta alto ta an que se comienzan a viyer las casas de Senyes. De turismo no n'i hai mica que puye ta'l lugar, perque l'acceso ye bien difícil sin 4x4.
Vinclos externos . Estadisticas d'el nuclio en el portal AragonEsAsi.com Información en el portal LosPirineos.info
Categoría:Lugars de Plan Categoría:Despoblaus d'a provincia de Uesca Categoría:Articlos en aragonés de la Comuna Categoría:Localidaz d'a diocesi de Balbastro-Monzón en Sobrarbe