Iste articlo tracta sobre Arro que ye un lugar de Sobrarbe. Ta altros usos d'a parola arro se veiga Arro (desambigación).
Arro ye un lugar aragonés d'o municipio de l'Aínsa-Sobrarbe, en a provincia de Uesca y comarca de Sobrarbe. A suya población ye de 35 habitants (2009 «Arro» en a subpachina «Relación de unidades poblacionales» d'o Instituto Nacional de Estadística, consultada l'1 d'octubre de 2010.)
O lugar d'Arro se troba en l'altura d'un tozalet, en as estribacions d'a sierra d'Arro desalpartau d'o groso d'a sierra por un recolón que i forma o barranco d'O Plano, en dominando a envista d'os campos que el rodeyan y d'o tramo central d'o río d'A Nata. Como en altros nuclios de Sobrarbe, a suya posición lo menos un poquet devantada por alto d'as tierras que el rodeyan fa pensar en una planificación defensiva d'a suya construcción orichinal.
O nuclio consiste d'una carrera unica, que en l'actualidat conecta con a carretera N-260 de l'Aínsa ta Campo en a sola surtida d'o lugar, y todas as casas tienen as suyas fronteras principals en mirando cara ta ella, cosa que puede interpretar-se como un formalismo defensivo d'antigos. A plaza d'Arro contiene a ilesia, que s'adedica a l'advocación de Santa María de L'Asumpción, construida en o sieglo XVI. A caracteristica definidera que remata l'aspecto actual d'o nuclio ye lo diposito d'augua en alto, construcción d'o sieglo XX, que s'albira per dencima d'os tellaus en o centro d'o lugar, en estando que pareix que ye a construcción mas altera que se i puede trobar.
Arro teneba municipio propio dica lo periodo 1842 - 1857, cuan que diz que s'achuntó con Griebal, Cherbe y Banastón ta formar achuntamiento de conchunta. «Arro» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultada l'1 d'octubre de 2010 En a decada d'os anyos 1960 os cuatro nuclios s'achuntoron con l'Aínsa renunciando a l'achuntamiento propio, pasando a fer parte d'o numero creixedor de nuclios adscritos a ixa villa, como tamién el fayoron en o mesmo periodo Castillón de Sobrarbe, Cosculluela, Guaso, Buil y Sieste. En 1981, o municipio conchunto de l'Aínsa, con toz os ditos nuclios, s'achuntó con l'achuntamiento d'Alto Sobrarbe ta formar l'Aínsa-Sobrarbe.
Imáchens
Fiestas 13 d'agosto, Fiesta Mayor, fendo-le honras a Sant Póliz. «Fiestas en Agosto» en a subpachina «Calendario Festivo» d'o portal oficial d'a Comarca de Sobrarbe, www.Sobrarbe.com, consultada l'1 d'octubre de 2010.
Vinclos externos
Referencias
Categoría:Lugars de l'Aínsa-Sobrarbe Categoría:Localidaz d'Aragón con fiestas patronals ta l'Asumpción de Santa María Categoría:Localidaz d'Aragón con fiestas patronals ta sant Póliz Categoría:Localidaz d'a diocesi de Balbastro-Monzón en Sobrarbe