Casualties of War (títol orichinal en anglés, en aragonés Victimas d'a guerra, estrenada en Aragón con o títol en castellano de Corazones de hierro, Corazons de fierro en idioma aragonés) ye una cinta estausunidense de l'anyo 1989 de drama belico dirichida por Brian De Palma seguntes un guión adaptau por David Rabe d'un articlo publicau por Daniel Lang en o diario The New Yorker (1969) que dimpués se convertió en libro y que a la vegada ye basau en feitos reals. Con una Banda Sonora Orichinal d'Ennio Morricone y una dirección de fotografía de Stephen H. Burum, Casualties of War fue producida por Art Linson y Fred C. Caruso ta las productoras Columbia Pictures y Art Linson Productions y en l'elenco d'a cinta destacan os actors Michael J. Fox, Sean Penn, Don Patrick Harvey, John C. Reilly, John Leguizamo, Thuy Thu Le, Erik King, Ving Rhames y Dale Dye, entre d'atros.
Casualties of War ye ambientada en os anyos 1960 mientres a guerra de Vietnam y se rodó mas que mas en escenarios naturals en Tailandia, con bellas escenas d'estudio filmadas en San Francisco (California). L'incident real, lo clamau incident d'a colina 192, s'escaició lo 19 de noviembre de 1966, cuan un grupo de soldaus de l'exercito estausunidense secuestroron, violoron y asasinoron a una mesacha vietnamita en o lugarón de Cat Tuong, en o districto de Phù Mỹ (provincia de Bình Định). Sobre iste mesmo feito delictivo ya s'heba rodau anteriorment una atra cinta en o cine alemán, o.k. (Michael Verhoeven, 1970). Ta Casualties of War se cambioron tot os nombres d'os participants en os feitos y tamién bellos aspectos relativos a ixos feitos.
Argumento La historia se presenta en forma de flashback, explicada por Max Eriksson, un antigo soldau de l'exercito estausunidense mientres a guerra de Vietnam. Eriksson remera que feba parte d'un grupo de soldaus estausunidenses en un servicio de patrulla nocturna, mandaus por o tenient Reilly. Cuan un d'os components d'a patrulla dentra en panico y revela la posición, reciben un ataque d'o Viet Cong y Eriksson caye en un tunel excavau por o Viet Cong mientres que ye cosirando un d'os flancos d'a posición en o combate. Tony Meserve, lo lider d'o pilotón d'Eriksson, consigue sacar-lo d'aintro d'o tunel y salvar-lo, y posteriorment os soldaus albandonan la chungla.
A patrulla descansa por difuera d'un lugarón a lo canto d'un río en a rechión de Tây Nguyên cuan lo Viet Cong lis fa una emboscada, morindo en l'ataque lo soldau especialista "Brownie" Brown, feito que provoca un gran impacto en Meserve en estar "Brownie" un d'os suyos amigos. Cuan tornan en a suya base, reciben como enfuerzo a lo soldau de primera clase Antonio Díaz, qui fará las funcions d'operador de radio d'o pilotón.
Frustrau porque ya fa tiempos que no li conceden un permiso, Meserve decide ordenar a lo suyo pilotón secuestrar a una nina vietnamita. Eriksson s'oposa frontalment, pero Meserve, o cabo Thomas E. Clark y lo soldau de primera clase Herbert Hatcher lo ignoran. Cuan Meserve, Clark, Hatcher, Díaz y Eriksson reciben a orden de fer un atra patrulla, Eriksson li eplica las suyas preocupacions por a situación a lo suyo amigo mas amanau, Rowan. En plegar a nueit, o pilotón dentra en un lugarón para secuestrar-ie a una nina vietnamita, Tran Thi Oanh.
Mientres que fan a suya patrulla por a chungla y las montanyas, Díaz prencipa a planteyar-se la suya participación en tot ixo y li demana a Eriksson que lo refirme. Pero cuan la patrulla y la nina secuestrada plegan en un lugar despoblau, Meserve, Clark y Hatcher menazan a Eriksson y Díaz decide a la fin ceder a la presión d'os atros, deixando solo a Eriksson en a esfensa d'a nina. Finalment, Meserve ordena a Eriksson fer de sentinela para asinas poder fer una violación en grupo de Tran, violando-la succesivament toz cuatro.
En rayar l'alba, Meserve ordena a Eriksson protecher a Tran mientres que los atros cuatro miembros d'o pilotón ocupan una posición amán d'un puent de ferrocarril dende lo cual se pueden controlar os accesos a una base d'operacions y deposito de subministros d'o Viet Cong. Simultaniament, Eriksson consigue que Tran comprenda que él no li fará garra mal y decide marchar sin permiso ta tornar a la nina con a suya familia. Tanimientres, Meserve ninvía a Clark ta que reculla a Eriksson y Tran y los porte con él en lo puent con o pilotón, y Eriksson no puet fuyir con a nina.
Meserve fa que Díaz demane refirme aerio amanau ta asinas poder fer un asalto en a base d'o Viet Cong y dimpués li ordena tamién que mate a Tran en emplegando un cutiello. Tanimientres, antes de que Díaz pueda matar-la, Eriksson dispara lo suyo rifle en l'aire revelando asinas a presencia d'o pilotón a lo Viet Cong y entablando-se un tiroteyo. Tran preba de fuyir-ne, encara que Clark l'apunyala terne que terne. Eriksson intenta salvar-la pero Meserve lo fa planto en seco y lo fa cayer en golpiando-lo con a culata d'a suya arma. Cayiu en o suelo, Eriksson veye con impotencia cómo tot o pilotón dispara contra Tran cuantas vegadas dica que caye d'o puent y muere.
En rematar a batalla, Eriksson dispierta en a base militar estausunidense, en una cama d'un hespital de campanya. Bien luego troba a lo suyo amigo Rowan y li explica los feitos. Rowan li diz que lo millor ye de charrar con o tenient Reilly y con o capitán Hill, os suyos superiors. Cuan lis explica, Reilly y Hill son partidarios d'ixuplidar lo succediu. Dabant d'a insistencia d'Eriksson, Hill decide disolver la unidat en asignando a los suyos miembros a d'atros destins; a Eriksson lo destina a una unidat especializada en dentrar en os tunels excavaus por o Viet Cong y a on iste ha plantau preseras, manifiestament ta situar-lo en un puesto bien perigloso.
Días dimpués, mientres que Eriksson se troba en una latrina, Clark intenta matar-lo fendo servir una granada de man (ye decir, un intento de fragging, palabra encunyada mientres ixa guerra, a on l'asasinato d'un companyero, a sobén un superior, estió frecuent) y Eriksson li fa cara y lo golpia con una pala, en decindo-le a Meserve, que ye present, que no cal matar-lo a él porque, total, a denguno no li importa lo que éls facioron. Meserve li fa la birla y finalment Eriksson marcha.
Eriksson ye en un bar trobando-ne-ie a un capellán castrense, a qui explica lo que s'escaició mientres a patrulla, y lo capellán lo comunica a los suyos superiors, ubrindo-se una investigación que remata con a compareixencia d'os cuatre violadors debant d'un consello de guerra. En a sentencia Meserve ye condenau a 10 anyos de treballos forzaus en licenciando-lo con deshonor de l'exercito estausunidense, Clark ye condenau a cadena perpetua, Hatcher a 15 anyos de treballos forzaus y Díaz a 8.
Alavez Eriksson dispierta en o mundo actual d'o suyo malsuenio y se troba en un tramvía en San Francisco, amán d'una estudiant d'orichen vietnamita que tiene bel pareixiu con Tran. Cuan a mesacha vietnamita baixa d'o tramvía, ixuplida la suya bufanda y Eriksson corre dezaga d'ella ta tornar-ne-la y la mesacha li fa la rialleta y marcha, pero Eriksson la clama en vietnamita y la mesacha creye que li remera a Eriksson bella persona y marcha.
Elenco Casualties of War en Internet Movie Database. Actor Papel Notas Michael J. Fox Eriksson Sean Penn Meserve Don Harvey Clark John C. Reilly Hatcher John Leguizamo Díaz Thuy Thu Le Oanh Erik King Brown Jack Gwaltney Rowan Ving Rhames Tenient Reilly Dan Martin Hawthorne Dale Dye Capitán Hill Steve Larson Achent John Linton Achent Vyto Ruginis Fiscal Al Shannon Wilkins Wendell Pierce MacIntire Sam Robards Chaplain Kirk Maris Valainis Streibig Darren E. Burrows Cherry Sherman Howard President d'o consello de guerra John Marshall Jones Policía militar Holt McCallany Tenient Kramer Kady Tran Yen Scott Gregory Soldau Ennalls Berl Soldau Vinh Tran Interprete d'o Viet Cong Somsak Interprete de Vietnam d'o Norte Hataya Sarmount Mesacha d'o lugar Ba Thuan T. Le Mai d'Oahn Nootch Nino d'o lugar Kwan Nino d'o lugar J. Chalerm Granchero viello d'o lugar Sigma Muller d'o lugar Po Powpi Granchero viello d'o lugar Shaun Shea Soldau Kristopher Dunn Soldau Donal Gibson Soldau Shane Kerwin Soldau Niran Viet Cong en o túnel Stephen Baldwin Soldau No acreditau Stefan Ehlers Sarchento Fuller No acreditau Gregg Henry Fiscal No acreditau Amy Irving Mesacha en o tramvía No acreditada Michael D. Jones Pasachero d'o tramvía No acreditau Jonathan MacLeod Soldau No acreditau Vic Noto Voz No acreditau Espérance Pham Thai Lan Chirmana d'a estudiant No acreditada
Producción Desarrollo Casualties of War se basa en feitos reals, en o clamau incident d'a colina 192 que s'escaició lo 19 de noviembre de 1966, cuan un grupo de soldaus de l'exercito estausunidense secuestroron, violoron y asasinoron a una mesacha vietnamita en o lugarón de Cat Tuong, en o districto de Phù Mỹ (provincia de Bình Định). Pero tamién se basa en Casualties of War, un amplo articlo publicau por Daniel Lang en octubre de l'anyo 1969 en The New Yorker y que publicó como libro un mes dimpués. Christopher Lehmann-Haupt: Incident on Hill 192, en The New York Times, 14 de noviembre de 1969, p. 45. O productor David Susskind en mercó los dreitos cinematograficos asperando producir-ne una cinta ta Warner Bros.. Second Phase Will Begin in Warners Revamping, en Los Angeles Times, 21 de chinero de 1970. p. d10. Pete Hamill redactó un guión y Jack Clayton heba de dirichir a cinta resultant, Leonard Sloane: Kinney Defends Warner Actions: Holders Are Told of Major Filming Activities, en The New York Times, 18 de febrero de 1970, p. 69. pero finalment o prochecto no se fació. En ixe inte, Michael Verhoeven dirichió ta lo cine alemán a cinta o.k., basada directament en os feitos reals, presentando-la a concurso en o Festival Internacional de Cine de Berlín en 1970 y que provocó controversias entre los miembros d'o churau d'os premios dica lo punto que en ixa edición finalment no s'atorgoron premios. Brian De Palma yera present en ixe Festival en presentando la suya cinta Dionysus in '69.
A finals d'os anyos 1970, Susskind anunció que finalment la cinta s'heba de producir ta la productora American Broadcasting Company, Mitch Broder: David Susskind: Growing Up in TV], en The New York Times, 19 de febrero de 1978, p. D31. pero en zagueras o prochecto no se concretó. En l'anyo 1979 David Rabe li mencionó la existencia d'o prochecto a Brian De Palma, qui s'intresó en él, pero no podió trobar financiación en ixe momento. Bellas anyadas dimpués Rabe ya heba escrito un guión y De Palma adhibió a lo prochecto a los actors Michael J. Fox y Sean Penn. Dentroron en conversacions con Paramount Pictures ta que finanzase la cinta pero la productora decidió no continar cuan o presupuesto ta la cinta puyó dende 17 millons de dólars dica los 20 millons. De Palma albandonó momentaniament o prochecto ta dirichir The Untouchables, que tenió a-saber-lo d'exito. Dawn Steel heba conoixiu o prochecto de Casualties of War cuan yera executiva d'a Paramount y cuan se convertió en chefa de producción en Columbia Pictures decidió que lo prochecto de Casualties of War estase la primera d'as suyas produccions. Bruce Weber: Cool Head, Hot Images, en The New York Times Magazine, 21 de mayo de 1989. Lawrence Van Gelder: At the Movies: A Linson-De Palma Vietnam film The man who makes Merchant-Ivory music The woman who made Day-Lewis sound like a Czechoslovak, en The New York Times, 26 de febrero de 1988, p. C8. Paul Rosenfield: It's Back to Vietnam for Hollywood: Columbia's Dawn Steel has a lot riding on a brutal Brian DePalma war movie. The tale behind her commitment to "Casualties of War", en Los Angeles Times, 13 d'agosto de 1989, p. R1. Steel afirmó que "Historicament, as cintas sobre la Guerra de Vietnam han estau bien rendals. Todas istas cintas, Platoon, Full Metal Jacket, Apocalypse Now, The Deer Hunter, ye veyendo cintas que mai no han teniu prou exito, pero han teniu muito exito. Os numeros en l'estranchero han estau extraordinarios".
Rodache