A seu de Sant Tito d'Irákleio (en griego Καθεδρικός Ναός Αγίου Τίτου) ye una seu ortodoxa d'a ciudat d'Irákleio (Creta, Grecia). Ye adedicada a sant Tito, patrón d'a isla.
Historia O santuario orichinal de sant Tito se trobaba en Gortina, l'antiga capital de Creta, a on o santo heba teniu a suya seu episcopal y a on s'alzoron as suyas reliquias dica a ruena d'a ciudat y o treslau d'a capital ta Irákleio mientres a dominación arabe en 828.
Dimpués d'a expulsión d'os arabes en o sieglo X, en a ubicación d'a ilesia actual se debantó un templo bizantino consagrau a sant Tito, a on s'alochoron as suyas reliquias procedents de Gortina, asinas como a Panagia Mesopanditissa (Virchen Meyadera), un icono muit venerau. Dimpués d'a cayida d'Irákleio debant d'os otomans en 1669, as reliquias fuoron tresladadas ta Venecia, a on encara permaneixe a mayoría. A Mesopanditissa, en particular, se troba en a basilica de Santa María d'a Salut. L'antiga ilesia bizantina de Sant Tito fue transformada en un puesto de culto islamico y fue conoixida como mesquita d'o Visir. Iste edificio fue destruyido por o tierratremo de 1856.
L'edificio actual fue construyido en 1869 como mesquita otomana por l'arquitecto griego Athanasios Moussis, o mesmo que disenyó a seu de Sant Menas. Tenió ixa función dica a decada de 1920, cuan os musulmans cretenses fuoron forachitaus ta Turquía. S'espaldó o minaret y a mesquita fue transformada en ilesia cristiana. Dende 1966 a ilesia alberga o relicario de sant Tito en o puesto de l'antigo mihrab.
Galería d'imáchens
Referencias
Tito d'Irákleio Irákleio Categoría:Molimentos d'Irákleio