A chudería de Mont Albán ye o barrio a on se trobaba establida a comunidat chudieva en a villa de Mont Albán (Cuencas Meneras, Teruel) entre os sieglos XIV y XV.
Descripción Se trobaba situada entre as actuals carreras Postigo y Emaús, estando un d'os principals accesos un pasadizo que trescruza l'edificio d'o numero 13 d'ista zaguera carrera. As parcelas que conforman a chudería siguen linias zigzaguiants y l'acceso en bels casos se fa a traviés de callizos zarraus.
I hai una casa, encara conoixida como "casa de los judíos", que encara tiene orientación ueste-este, por lo que podría estar l'antiga sinoga. A carrera Emaús sería a muga septentrional d'a chudería, estando amugada por o sud por a propia muralla d'a villa. En l'actual carrera Postigo se trobaba a puerta de l'Almudí, que daba acceso dreitament a o barrio chudieu y que yera una d'as cuatre que teneba a villa.
Historia Encara que no son mencionaus en a cata de población de l'anyo 1208, en zaguerías d'o sieglo XIII ya se documenta bel asentamiento chudieu como Jucef Çatich, manimenos no ye dica l'anyo 1309 cuan o rei Chaime II comunica a Don Artal de Huerta, comendador d'a Orden de Sant Chaime a instalación de dica diez familias chudievas procedents d'a chudería de Zaragoza.
L'alchama se rebustirá institucionalment mientres o reinau de Pero IV, con a creyación en 1337 de bels privilechios mercantils que la equiparaban con atras chuderías d'a epoca como a de Daroca. Asinas en primerías d'o sieglo XIV a villa y as suyas aldeyas sumaban 564 fuegos, lo que feba entre 2.250 y 2.500 personas, estando por ixas envueltas chudieva un 5% d'a población total de Mont Albán.
Manimenos en o zaguer cuatreno d'o mesmo sieglo XIV, mientres o reinau de Chuan I, prencipiará o declín d'a comunidat chudieva en Mont Albán, en un clima cheneral d'inestabilidat politica y economica a lo que s'uniba una considerable puyada d'a presión fiscal. Ya en l'anyo 1415 con Ferrando I en o trono prencipió a conversión masiva a o cristianismo u o treslau ta atras alchamas como Oliet y Teruel d'os zaguers chudieus que quedaban en Mont Albán.
Bibliografía Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames.
Vinclos externos
La olvidada judería de Montalbán. Sfarad. La judería de Montalbán. Concello de Mont Albán.
Mont Albán Categoría:Historia de Mont Albán