L'aragonés oriental son as variedaz d'aragonés que se charran en Ribagorza, a Fueva y Val de Chistau. En un sentiu amplo (y sin parar cuenta en a propuesta de clasificación d'as parlas altoaragonesas en cuatre brancas), l'aragonés oriental tamién comprendería l'aragonés central d'a cuenca de Cinca y l'aragonés meridional d'o Semontano de Balbastro.
Fonetica Sonorización d'as xordas intervocalicas latinas en a mes gran part d'os casos: Meligo, caixigo, forau. Melico, Caxico y Forato tienen xorda en lugars y comarcas mas meridionals de l'Alto Aragón, asinas que pareixe que a sonorización encomenzó de forma independient que en aragonés meridional y occidental. O fenomeno encomenzó ya en o sieglo X, como demuestra o texto latino arromanzau de "as decimas de Castillón". A toponimia contrimuestra que fa uns sieglos o sector oriental no sonorizaba tanto, porque mos trobamos forato en a toponimia d'a Fueva.
Bi ha mes casos que en atras variedaz d'aragonés d'evolución d'o grupos latíns -TY, -CE, -CI, -DE en posición final ta -u como en catalán, en especial a vocalización en -u d'este zaguero: Javier Terrado Pablo: Los participos ribagorzanos en -áu, -éu, -íu. Caplletra nº 32.. HEREDE-M > *hered > hereu. PEDE-M > *ped > peu. PRODE > *prod > prou. SEDE-M > *sed > seu y o toponimo Chuseu. GRADU-M > *grad > grau y o toponimo Graus.
Morfolochía Participios en -au, -iu por vocalización d'a -d final producto d'una primera sonorización seguida de l'apocope d'a o final d'acuerdo con a lei fonetica debantdita: CANTATU > cantado > cantad > cantau. PERDETU > perdedo > perded > perdeu (en benasqués) > perdiu. SENTITU > sentido > sentid > sentiu. Pasau perfecto perifrastico como o catalán moderno: "el(l) va cantá" en cuenta de "él cantó" Conservación buena d'a pronombre adverbial i, ie, mesmo en zonas muito a lo sud a on atras variedaz, (meridionals), la han perdida.
Conclusions Se conservan bien as caracteristicas que son comuns en catalán y aragonés.
Divisions Chistabín. Fovano. Ribagorzano. Altorribagorzano u benasqués. Zona A. Zona B. Zona C Meyorribagorzano. Campés. Baixorribagorzano. Grausino. Estadillano. Foncense.
Nota: Foncense, Estadillano, Grausino, Campés, etcetera..son parlas locals; Fovano, Baixorribagorzano, Benasqués, Chistabín, etcetera...son parlas de comarca, (u una val en concreta).
Referencias
*