O lión asiatico () ye una subspecie de lión, estando a unica que se puet trobar actualment difuera d'Africa en libertat. Ye un d'os felins mas menazaus d'o mundo. Actualment nomas en quedan 350 en libertat en a selva de Gir en o estau de Gucharat, en a India. A suya distribución historica iba dende a India dica a peninsula d'os Balcans.

Descripción Encara que se pareixen muito a os lions africans tienen bellas diferencias con éls. Ye mas chicot que os suyos primos africans. Os masclos fan 1,7-2,2 metros y pesan entre 150-225 kg, y as fembras fan 1,4-1,7 metros y pesan 100-150 kg.

Os masclos tienen clinera, pero mas curta y mas royenca que les plega dica o peito igual que o suyo parient mas amanau, o lión de l'Atlas, con qui compartiba bellas caracteristicas cranials absents en os lions africans. Tamién forma manadas, pero mas chicotas, composadas por un regular por 2 fembras en cuentas de 4–6 como os lions africans.

Habitat y distribución Orichinalment i heba lions en os Balcans, en Anatolia, en o Caucas, en Orient Proximo, en Afganistán, en Pakistán y en a India.

Entre l'anyo 80 y o 100 s'extinguió en Grecia. En o sieglo X s'extinguió en Armenia y en o sieglo XII en Palestina. Dica zaguerías d'o sieglo XVIII y primerías d'o sieglo XIX a suya distribución no sofrió mas cambios significativos.

S'extinguió en Turquía alto u baixo en l'anyo 1800. En Pakistán y Afganistán arredol de 1810. En a val d'o río Narmada (India⁣) en 1848. En a decada de 1850 s'extinguioron en Delhi. Desapareixioron d'o Kurdistán en 1870, de Siria en 1891, d'Irak en 1918 y d'Irán en 1941. Arredol de l'anyo 1900 se protechioron os zaguers lions indios, encara que i fació una sequera poco dimpués que deixó sin de presas a os lions, feito que les obligó a atacar a os humanos que los perseguiban, lo que prevocó que en 1913 nomás quedasen 13 lions en a India.

Estau actual A población ha creixiu progresivament dica os 360 exemplars actuals, pero como toz son descendients de 13 i hai problemas d'endogamia. Como a población de lions ha iu nantando, o espacio protechiu s'ha tornau insuficient fendo que os lions y os humanos dentren en conflicto. Pa mirar de solucionar-lo i hai un prochecto pa reintroducir os lions en Kuno, a on s'extinguioron en l'anyo 1873.

Referencias

Persica