Casa Antón de Mur u tamién conoixita como Casa Antón Barrau ye una casa fortificata d'o lugar de Bestué, en a val de Puértolas, Sobrarbe, Uesca. Ye un sobrebuen eixemplo d'arquitectura renaixentista altoaragonesa. Se tracta d'un edificio catalogato como Bien d'Intrés Cultural.
Descripción De planta alto u baixo cuadrata, tien dos cuerpos de menor grandaria adosatos: un en o extremo d'a frontera prencipal, d'una planta y destinato a os animals y unatro en a lateral de dos pisos, trobando-se d'antis mas en o superior a masadría u forno de pan. En total l'edificio actual conta con tres plantas amás d'una falsa baixo cubierta, encara que orichinalment en teneba una mas. A construcción ye de mampostería con piedra panal prou irregular y asentata con a saber-la argamasa. A cubierta ye feita con losa a dos auguas, que verten a las fronteras.
Destacan en l'exterior a suya frontera prencipal y una lateral, con vanos de gran calidat que corresponden a la epoca de construcción orichinal de l'edificio. Istos se troban de forma regular y simetrica en as tres plantas prencipals, en a puerta y as dos finestras de mayor grandaria en l'eixe prencipal y atros mas chicoz en os dos eixes laterals.
A puerta se troba chusto en o centro d'a frontera y ye d'arco de meyo punto con amplas adovelas. En a clau i hai un chicot escudet a on se representan una letra B, tres bandas verticals y un animal con forma d'onso. En a mesma planta baixa i hai una finestra estreita y abocinata que remata en un arquillo de meyo punto.
250px|left|thumb|Detalle d'a finestra central
As finestras d'a primera planta son adintelatas, presentando diferents combinacions de molluras en brancas y limedars, estando basicament composatas por listels y escabetas. Os rafes son diferents, con distinto vuelo y una d'as finestras presenta un motivo de soguiato oblicuo enmarcato por línias ondulatas en a parti inferior y superior. Son tamién diferents as espilleras ubiertas baixo os vanos d'as finestras d'os dos extremos, estando en una d'ellas foratata a piedra con motivos radials y en l'atra cuatre relieus circulars en vueito con un rectanglo de cantos corvatos tallato en o suyo interior. Ye destacable a finestra central d'a planta superior, que ye tripartita, de tipo francés, con as brancas, limedar y mainel molliatos y con a inscripción "1562 ANTON BARRAU". Se proteche con una imposta molliata eixient que contiene en a parti superior un escudet trestallato con diferents motivos.
En o rafe d'o tellau i hai una filera d'alto u baixo 20 canetes de piedra y con relieus tallaus en as frents que lo refirman. Entre a simbolochía se troban simbols solars curvos y dreitos, hexafolias, rostros, tozuelos d'animals, un onso parellano a o que apareixe en a puerta y haspas. L'orden actual en que se troban istos canetes no se corresponde pas con l'orichinal.
Destaca una chicota finestra circular y unatra cuadrangular, que feban funcions d'espilleras, en o lateral d'a planta baixa, asinas como finestras de posiento en a primera planta, con a suya correspondient espillera baixo o rafe. As dos finestras laterals cegadas, que corresponden a l'actual falsa, perteneixeban orichinalment a unatro piso adicional.
Vinclos externos
Ficha en o SIPCA En Patrimonio Cultural de Aragón
Categoría:Biens d'Intrés Cultural de Sobrarbe Anton de Mur Anton de Mur, casa Categoría:Molimentos de Bestué