Palmira Pla Pechovierto naixida de Cretas en 1914 y muerta en Castellón d'a Plana lo 27 d'agosto de 2007) estió una pedagoga, mayestra y politica aragonesa.
Filla d'un Guardia Civil, Palmira Pla vivió en La Puebla d'Íxar y en Cedriellas, an que destinoron a su pai. Mientres a Guerra Civil espanyola habió de tresladar-se a Barcelona y Valencia, pero dimpués tornó ta Teruel ta continar a suya faina docent en a zona republicana d'Aragón.
A la fin d'a Guerra Civil Espanyola, s'exelló en Francia, an que colaboró con a resistencia y conoixió a lo suyo esposo, Adolfo Jimeno. En 1946, emigran enta Venezuela. Treballó en o colechio Los Caobos de Caracas, dica que se tresladoron ta Maracay. Astí creyoron o Instituto Escuela Calicanto, an que Palmira y Adolfo aplicoron os metodos pedagochicos d'a Institución Libre de Enseñanza. Habioron de tornar ta Espanya en 1975 y vender o colechio por una malotía de l'hombre suyo.
Mientres a Transición Espanyola estió mayestra en Val d'Algorfa. En 1977, Palmira Pla fue esleita deputada d'as Corz Constituyents por o PSOE en a provincia de Castellón. Mientres ixe tiempo, no deixó de vesitar semanalment a escuela de Val d'Algorfa. Dimpués d'homologar-se a Constitución, tornó a la suya faina docent en Almazora, provincia de Castellón an que exerció durant 3 anyadas, dica que se chubiló.
En os zaguers anyos decidió donar 840.000 euros, provinients d'a venda d'a suya escuela en Venezuela, ta a Fundación d'a Universidat Carlos III (o suyo rector, Gregorio Peces-Barba, heba presidito as Corz en 1977). Asinas se creyoron as becas Palmira Pla, con a fin de que estudiants venezolanos puedan estudiar en a Universidat Carlos III de Madrit.
Categoría:Pedagogos d'Aragón Categoría:Politicos d'Aragón Categoría:Politicos d'o Partido Socialista Obrero Español Categoría:Exiliaus d'o franquismo Categoría:Exiliaus d'o franquismo en America Categoría:Muertos en Castellón de la Plana Categoría:Naixius de Cretas Categoría:1914 (naixencias) Categoría:2007 (muertes)