Variola virus (en latín, «vereno d'a picueta») ye una especie de virus d'o chenero Orthopoxvirus, en a familia Poxviridae (virus d'a picueta y relativos) en a que bels autors lo subclasifican adintro d'una presunta subfamilia que en dicen Chordopoxvirinae. Causa patochenicidat unicament, que se'n sepa, en o ser humán, on que la infección, cas que i prospere, desarrolla la picueta.
Variola virus ye un virus con envuelta membranosa (construita a partir d'a membrana de l'apariello de Golgi d'as celulas d'o huespet) que deixa adintro una capside virica de simetria helicoidal, con unas dimensions aproximatas, en chunto, de 302 dica 350 nanometros de lonchitut, per bels 250 - 270 nm d'amplura. O chenoma consiste d'un fragmento només (bi ha virus DNA que lo lievan fragmentato, p. ex. lo virus d'a gripe), de dople catiena de DNA, con forquetas d'apariellamiento de bases en os estremos d'a suya secuen¨cia, con una lonchitut aproximata de 186 kilopars de bases (ixo ye, una particla virica muit gran). O virión u particla virica sin de cubierta membranosa (per eixemplo, extraito per lisi celular in vitro d'una celula infectata, u bien, lavata con deterchents especificos) mantién a suya infectividat, a la contra que muitas altras especies viricas con envuelta lipidica.
A especie virica mes emparentata ye lo Molluscum contagiosum virus (chénero Molluscopoxvirus), causant d'un tipo de verrugas epidermicas (lo Molluscum contagiosum) inocuas de tot.
Cerclo replicativo O cerclo replicativo de Variola virus ye bien enreligato, por tanto incluye tamién diversas formas infectivas, que tienen mecanismos diferents ta dentrar en a celula. A primera fase replicativa se produce en a mucosa d'a farinche d'a persona, adubindo-se la primera viremia (viremia primaria) d'entre 17 y 21 días dempués d'o contachio. Dimpués d'ixo, amaneixen picuetas en a luenga y cuan istas s'ubren, se fa cheneral l'aparición d'o rash maculopapular en tot o cuerpo, dintro d'un plazo de 4 días dende la primera afección d'a farinche. Como la mes gran parte d'as infeccions viricas, la primera viremia no produce garra simptoma carateristico, si que fa frebera, mal de capeza, y os tipicos simptomas asociatos con as infeccions viricas en cheneral (ixo ye perque la respuesta inmune antiviral sigue cuasi siempre las mesmas vías).
As pustulas y las suyas restas (s'ixucan y cayen como costas) son o material mes contachioso. En a fase de rash, a capacidat de contachio no s'estingue dica que lo huespet pierde la zaguera crosta de pustula, en un tiempo que puet estar dica d'un mes dempués d'os primers simptomas. O contenito en particlas viricas d'as ditas crostas ye inmenso, y ixo fa que tamién a ropa de vestuache y d'o leito sigan contachiosas.
Se veiga tamién Picueta Poxviridae
Vinclos externos
Categoría:Orthopoxvirus Variola