Wallace Beery estió un actor estausunidense, naixito l'1 d'abril de 1885 en a ciudat de Kansas City (Missouri) y muerto o 15 d'abril de 1949 en Beverly Hills (California). Prencipió a suya carrera como actor en o mundo d'o teatro, dimpués de probar fortuna en o mundo d'o circo en o Circo Ringling Brothers, que albandonó en estar feriu por un tigre. Dende 1913 treballó en Chicago ta Essanay Studios, tresladando-se dimpués enta California, en a mesma productora. Activo en o cine estausunidense dende meyatos d'os anyos 1910, dende as anyadas d'o cine mudo, dica zaguerías d'os anyos 1940, con alto u baixo 250 títols, recibió cuantos premios mientres a suya carrera cinematografica. Yera chirmán de l'actor Noah Beery y tamién ye tío d'o tamién actor Noah Beery Jr., fillo d'o suyo chirmán. Mientres os anyos 1930 estió un d'os actors millor pagaus d'o mundo d'o cine. En o suyo contracto signau con a productora Metro-Goldwyn-Mayer en 1932 s'estipulaba que Beery cobraría un dólar mas que cualsiquier atra persona contractada por a Metro-Goldwyn-Mayer.
En 1916 casó con l'actriz Gloria Swanson, a qui heba conoixiu en o rodache d'a cinta Sweedie Goes to College en 1915, pero o matrimonio tenió problemas por l'adicción a l'alcoholismo de Wallace y por os suyos malos tractos ente Gloria y, finalment, plegó en un esvurcio en 1919. Wallace tornó a casar-se en 1924, con Rita Gilman y Gloria Swanson casó en o mesmo 1919 con Herbert K. Somborn.
D'entre a suya filmografía, se puet mencionar as suyas interpretacions en bellas cintas como Victory (1919, Maurice Tourneur), Robin Hood (1922, Allan Dwan), Three Ages (1923, Buster Keaton), Billy the Kid (1930, King Vidor), Min and Bill (1930, George W. Hill), The Champ (1931, King Vidor), Viva Villa! (1934, Jack Conway), China Seas (1935, Tay Garnett), u Port of Seven Seas (1938, James Whale).
Premios Wallace Beery recibió un premio Oscar a o Millor Actor en 1932 por o suyo papel en a cinta The Champ, de King Vidor. O premio estió compartito con l'actor Fredric March.
Tamién recibió en 1934 a Copa Volpi a o Millor Actor d'o Festival Internacional de Cine de Venecia por a suya interpretación en a cinta Viva Villa!, de Jack Conway. Ista estió a primera concesión d'o premio.
Antiparte, en 1930 fue nominato a o premio Oscar a o Millor Actor por o suyo papel en a cinta The Big House, de George W. Hill.
Postumament, en 1960, se li adhibió una estrela a lo Paseyo d'a Fama de Hollywood, estando a suya estrela situada en o 7001 de Hollywood Boulevard d'a ciudat de Los Angeles. Wallace Beery en Walk of Fame Stars.
Filmografía Como actor