Mariano Menéndez Valdés foi un abogáu y políticu asturianu.
Biografía Nun ta clara la fecha de so nacencia, Constantino Suárez da la fecha del 6 de xineru de 1840, mientres que la so partida de bautismu diz que lu bautizaron el 25 de xineru de 1840 y que naciera'l día anterior, el 24 de xineru.
Estudió nel Institutu d'Uviéu y llicencióse en Derechu na Universidá d'Uviéu. Establecióse como abogáu en La Pola Llaviana enantes de ser elixíu diputáu pola provincia d'Uviéu en 1866. En 1873 treslladóse a Madrid pa exercer de delegáu de segunda clase de la policía xudicial y gubernativa. En 1874 convirtióse nel alministrador principal de Correos n'Uviéu y en 1877 promotor fiscal de Llaviana y de Navalcarnero (Madrid). En 1879 nómenlu Xefe de Negociáu na Dirección Xeneral de Prisiones. Nesa dómina collabora gran actividá lliteraria collaborando na prensa madrilana y asturiana, especialmente n'El Carbayón, anque tamién en Revista de España, La Época, La Correspondencia de España, El Globo, La Mañana, El Faro Asturiano y El Anunciador.
N'abril de 1887 destínenlu pa les Filipines, daquella parte del imperiu español, onde foi gobernador de les provincies de Pangasinan, Laguna y Bataan, amás de xefe d'alministración de lo contenciosu alministrativu de les islles.
Foi ellí onde morrió'l 8 de mayu de 1891, anque esta fecha varia tamién según autores.
Obres Constitución política y civil de Roma pagana, con la de las sociedades cristianas y modernas La juventud liberal y la revolución del 68 ante la restauración y la monarquía de Alfonso XII Los carbones asturianos: importancia y necesidad de la industria carbonera en Asturias (1877) Historia crítico-filosófica de la Monarquía asturiana (1881)
Notes
Referencies
Enllaces esternos
Categoría:Políticos y polítiques d'Asturies Categoría:Diputaos y diputaes pola provincia d'Asturies Categoría:Persones de Llaviana