Rose Christiane Ossouka Raponda ye una economista y política gabonesa miembru del Partíu Democráticu Gabonés. Dende'l 9 de xineru hasta'l 30 d'agostu de 2023 desempeñóse como vicepresidenta de Gabón, siendo la primer muyer n'ostentar el cargu. Dende febreru de 2019 hasta xunetu de 2020 desempeñóse como ministra de Defensa de Gabón. El 16 de xunetu de 2020 asumió'l puestu de primera ministra de Gabón siendo la primer muyer n'ocupar el puestu na historia de Gabón. Tamién foi la primer alcaldesa de Libreville, la capital del país..
Biografía Nació en 1964 en Franceville, d'orixe Mpongwe. Economista de formación, diplomóse nel Institutu d'Economía y Finances de Gabón especializándose en finances públiques. Foi directora xeneral d'Economía y a principios de los 2000 directora xeneral Adxunta del Bancu de la Vivienda de Gabón.
En 2012 llegó al gobiernu de la mano del primer ministru Raymond Ndong Sima. Desempeñóse como Ministra de Presupuestu dende febreru de 2012 hasta xineru de 2014. Nes elecciones municipales d'avientu de 2013, n'octava posición na llista del presidencial Partíu Democráticu Gabonés foi escoyida conseyera del tercer distritu de Libreville y un mes dempués, el 26 de xineru de 2014, aporta a l'alcaldía, siendo la primer alcaldesa na historia de la capital de Gabón. Tamién asumió la presidencia de Ciudaes y Gobiernos Llocales Xuníos d'África.
El 12 de febreru de 2019, foi nomada Ministra de Defensa de Gabón nel gobiernu de Julien Nkoghe Bekalé pol presidente Ali Bongo Ondimba dempués del intentu de golpe d'Estáu en xineru de 2019. Reemplazó a Etienne Massard Kabinda Makaga, un miembru de la familia Bongo, quien ocupaba'l cargu dende 2016. El 16 de xunetu de 2020 foi nomada primer ministra de Gabón, dempués de que'l so predecesor, Julien Nkoghe Bekale, arrenunciara. Ye la primer muyer n'ocupar el puestu na historia de Gabón. El so nomamientu constitúi'l cuartu cambéu de gabinete de Bongo Ondimba dende'l golpe fallíu, que se produció mientres la doble crisis sanitaria y económica por cuenta de la pandemia de COVID-19 y la cayida del preciu del petroleu, unu de los principales recursos del país.
Referencies
Enllaces esternos
Categoría:Políticos y polítiques de Gabón