El Paisano: Un retrato colectivo ye un llargumetraxe documental estrenáu en 2005, dirixíu y escritu por Ramón Lluís Bande. La película céntrase na figura d'Horacio Fernández Inguanzo (conocíu como «El Paisano»), un líder históricu del Partíu Comunista d'España (PCE) y activista social d'Asturies, valiéndose de la so biografía como filu conductor pa pescudar na historia de la resistencia antifranquista y la memoria democrática na rexón. El documental ye parte de la filmografía del Nuevu Cine Asturianu.
Argumentu La película nun s'enfoca namái na vida d'Horacio Fernández Inguanzo, emplégalu como'l nuedu d'un retratu colectivu de la llucha obrera y política n'Asturies mentanto la dictadura de Francisco Franco. Per aciu de catorce testimonios, una carta y un cantar, el documental detalla los episodios clave de la vida clandestina y la represión franquista.
Los temes centrales que s'abarquen incluyen: la vida de la guerrilla, la llucha poles condiciones llaborales, la güelga xeneral revolucionaria de 1962 y el papel cimeru de les muyeres na resistencia antifascista.
Testimonios Los testimonios recoyíos son los de Manuel García Fonseca «El Polesu», Gerardo Díaz Solís «El Portu», Ángel Zapico Fernández «Gelín», Ana Sirgo «Anita la de Lada», Azucena Álvarez García, Primitiva Sánchez Faes, Manuel Otones, Senén Fernández Fernández, Policarpio, Vicente García Solís, Conchita Valdés, Manuel Rodríguez Rodríguez, Juan Fernández Ania y Clementina Fernández Inguanzo.
Equipu téunicu y producción El documental foi producíu por Robert PC y la Fundación Horacio Fernández Inguanzo, cola participación de la Fundación Juan Muñiz Zapico. La música cuerre al cargu del cantautor asturianu Víctor Manuel que, en 1976, dedicó-y a Horacio Fernández Inguanzo la canción «El paisano».
Reconocimientos El documental proyectóse en dellos foros de memoria histórica y festivales de cine documental n'España. Foi mencionáu como parte de la filmografía del Nuevu Cine Asturianu.
Reacciones
Referencies
Enllaces esternos
Categoría:Cine asturianu Categoría:Documentales