Slavoj Žižek ye un filósofu, socioanalista y críticu cultural eslovenu. Ye director internacional del Birkbeck College de la Universidá de Londres. Imparte filosofía continental, sicoanálisis, politoloxía, estudios culturales, crítica cinematográfica, marxismu, hegelianismu y teoloxía.
En 1989 Žižek publicó el so primer testu n'inglés, "The Sublime Object of Ideology", nel que s'estremó de la teoría marxista tradicional para desenvolver una concepción materialista de la ideoloxía que basóse en gran midida nel sicoanálisis lacanianu y l'idealismu hegelianu.
En 2012 Foreign Policy incluyó a Žižek na so llista de los cien meyores pensadores globales, llamándolo una "celebridá filosófica". El trabayu de Žižek foi narráu nun documental del añu 2005 tituláu Zizek!. Una revista académica, l'"International Journal of Žižek Studies", fundóse para entender el sp trabayu.
Biografía La so familia proviene de Transmurania.
Žižek estudió Filosofía y Socioloxía na Universidá de Llubliana y sicoanálisis na Universidá de París VIII, onde doctoróse. La so carrera profesional inclúi un puestu d'investigador nel Institutu de Socioloxía de la Universidá de Llubliana, Eslovenia, según cargos de profesor convidáu en diverses instituciones, qu'inclúin Universidá de Columbia, Universidá de Princeton, New School for Social Research de Nueva York y Universidá de Michigan, ente otros. Na actualidá ye director internacional del Institutu Birkbeck pa les Humanidaes.
Žižek utiliza nos sos estudios exemplos extrayíos de la cultura popular, dende la obra d'Alfred Hitchcock y David Lynch, hasta la lliteratura de Franz Kafka o William Shakespeare, amás de problematizar autores escaecíos pola academia como Vladímir Ilich Lenin, Josif Stalin y Maximilien Robespierre y tratar ensin reconcomios tarrezas espinosos como el fundamentalismu, el anticapitalismu, la tolerancia, la suxetividá y lo políticamente correcto na filosofía posmoderna. Coles mesmes, en contraposición colos postulaos intelectuales de la esquierda universalista europea polo xeneral, y de los que Jürgen Habermas defini como posnacionales en particular, Žižek realiza una defensa abierta ya inequívoca de los procesos soberanistas abiertos n'Europa.
Utiliza tamién la teoría sicoanalítica na versión lacaniana como un arma pa los sos habituales análises de política internacional, considerando non solo a los líderes y los sos posibles problemes sicolóxicos, sinón tamién a la sociedá nel so conxuntu.
En 1990 foi candidatu a la presidencia de la República d'Eslovenia, aunque nun resultó escoyíu.
L'enclín de Žižek a reciclar partes de los sos propios testos en trabayos posteriores resultó na acusación d'auto-plaxo per parte del The New York Times en 2014, dempués de que Žižek publicara un artículu d'opinión na revista que contenía partes de los sos escritos d'un llibru anterior. En respuesta, Žižek expresó perplexidá énte el tonu severu de la denuncia, enfatizando que los pasaxes reciclados en cuestión solo actuaben como referencies de los sos llibros teóricos para complementar l'escritura orixinal.
Noam Chomsky ye críticu con Žižek, de quien diz que es culpable d'«usar términos elegantes como polisílabos y pretender que tien una teoría cuando nun tien nenguna teoría», y tamién que les teoríes de Žižek nunca van «más allá del nivel de daqué que puedes esplicar en cinco minutos a un neñu de dolce años».
Žižek espresó opiniones nes que defiende l'universalismu eurocéntricu y reconoz aspeutos positivos de la dominación colonial. Estes opiniones fueron criticaes por diverses figures del marxismu y l'esquierda: dellos exemplos son la feminista india Nivedita Menon, l'intelectual iraní Hamid Dabashi, el pensador arxentín decolonial Walter Mignolo ya inclusive daquién más próximu a Žižek, el marxista mexicanu David Pavón Cuéllar ente otros.
Les posiciones filosófiques y polítiques de Žižek non siempres son claramente comprensibles, y el so trabayu foi criticáu por nun adoptar una postura coherente. Magar afirmó un proyectu marxista revolucionariu, la so falta de visión sobro les posibles circunstancies que podríen conducir a una revolución esitosa fai que nun tea claro en qué consiste esi proyectu.
Referencies
Bibliografía
Enllaces esternos
Categoría:Persones de Liubliana Categoría:Persones de Transmurania Categoría:Filósofos y filósofes d'Eslovenia Categoría:Sociólogos y sociólogues d'Eslovenia Categoría:Comunistes d'Eslovenia Categoría:Escritores d'Eslovenia