Kingdom Come: Deliverance II ye un videoxuegu checu d'aición y rol desarrolláu por Warhorse Studios y espublizáu por Deep Silver. Ye la secuela de Kingdom Come: Deliverance (2018) y espublizóse en tol mundu el día 4 de febreru del añu 2025 pa Microsoft Windows, Xbox Series X y Series S y PlayStation 5. El videoxuegu presentóse nun eventu priváu al entamu d'abril y finalmente anuncióse el 18 d'abril de 2024.
Desarrollu El direutor Daniel Vavra comentó que Kingdom Come: Deliverance II yera lo que se suponía qu'había de ser el so precedesor, pero que nel momentu nun pudieron facer por falta d'esperiencia y recursos. Según el direutor, la primer entrega demostró que'l conceutu funcionaba, polo qu'aprovecharon Deliverance II pa llevalu al "siguiente nivel".El presupuestu foi de 41 millones de dólares y ganó'l triple n'ingresos de ventes del xuegu.
Trama miniaturadeimagen|El castiellu de Trosky ye un puntu clave del xuegu. La trama escomienza poco depués de la final del primer xuegu y ambiéntase nel conflictu real ente los partidarios del rei Wenceslao de Luxemburgo, llexítimu rei de Bohemia, pero incompetente dafecho, y los del rei Sexismundo de Luxemburgo, rei d'Hungría, muncho más capaz, pero que toma'l poder en Bohemia dexando que'l so exércitu afare aldees y ciudaes lleales a Wenceslao.
El noble Sir Hans Capon viaxa con Henry de Skalice, el protagonista de dambos xuegos, y cola so compaña al castiellu de Trosky pa entrugá-y a Otto von Bergow pola so alianza col Rei Sexismundo, cola esperanza de consiguir que cambie de bandu. Unos bandíos ataquen la compaña, pero Capon escapa col súbditu Henry al castielllu. Desgraciadamente nun puen demostrar les sos identidaes y nun-yos dexen entrar y Bergow nun s'alcuentra nel castiellu.
Henry pescancia que Bergow va asistir a una boda na villa de Semine. Nel castiellu prenden a Capon y senténcienlu a muerte por caza illegal, pero Bergow llega xusto a tiempu pa reconocelu y salvá-y la vida. Bergow pide a los dos amigos que lu ayuden a acabar colos bandíos qu'afaren la rexón.
La trama complícase cuando un bandíu cativu cúnta-yos que'l fíu d'ún de los señores al serviciu de Bergow, Olda Semine, ta combalacháu colos criminales. Agora'l xugador pue decidir ente denunciar a Olda o xuntase col so bandu. En cualesquier casu, los acontecimientos que sigan a dambes decisiones lleven a Henry a la rexón de Kutná Hora (Kuttenberg), onde conoz a varios personaxes históricos con quien entama un gran plan pa desestabilizar a Sexismundo y volvé-y el poder al rei llexítimu.
Premios Kingdom Come: Deliverance II ganó'l premiu a meyor xuegu de PC na Gamescom 2024.
Referencies
Categoría:Videoxuegos de mundu abiertu Categoría:Videoxuegos pa PlayStation 5 Categoría:Videoxuegos de rol Categoría:Videoxuegos pa Windows