Timnit Gebru ye una científica informática etiope-americana especializada n'intelixencia artificial, visión artificial, sesgu algorítmicu y ética de la teunoloxía. Cofundó la comunidá Black in AI y ye fundadora y direutora executiva del Distributed Artificial Intelligence Research Institute (DAIR). Anteriormente foi investigadora de Microsoft Research y codireutora del equipu Ethical Artificial Intelligence de Google.
Biografía Gebru nació n'Etiopía y treslladóse a Estaos Xuníos durante la so mocedá. Estudió inxeniería llétrica na Universidá Stanford y trabayó posteriormente n'Apple, onde participó nel desarrollu de circuitos y algoritmos de procesamientu de señal. Volvió a Stanford pa realizar un doctoráu en visión artificial baxo la supervisión de Fei-Fei Li.«Timnit Gebru», Stanford Artificial Intelligence Laboratory.
La so tesis investigó l'usu de grandes coleiciones d'imáxenes y métodos de visión artificial pa estudiar patrones sociales y demográficos. Dempués del doctoráu incorporóse a Microsoft Research, onde trabayó nel grupu FATE, dedicáu a equidá, responsabilidá, tresparencia y ética de los sistemes automatizaos.
Xunto con Joy Buolamwini publicó investigaciones que demostraben diferencies importantes nel rendimientu de sistemes comerciales de reconocencia facial según el tonu de piel y el xéneru de les persones analizaes. Gebru foi tamién una de les fundadores de Black in AI, organización creada p'aumentar la presencia de persones negres na investigación n'intelixencia artificial.
En Google codirixó l'equipu Ethical Artificial Intelligence. En 2020 la so salida de la compañía, tres un conflictu alredor d'un artículu académicu sobre los riesgos ambientales y sociales de los grandes modelos de llinguaxe, provocó un ampliu debate sobre la llibertá investigadora nes empreses teunolóxiques. En 2021 fundó'l Distributed Artificial Intelligence Research Institute, concebíu como una organización independiente dedicada a investigar los impactos sociales de la IA.
Referencies
Enllaces esternos
Distributed Artificial Intelligence Research Institute
Categoría:Informáticos ya informátiques d'Estaos Xuníos Categoría:Informáticos d'Etiopía Categoría:Investigadores d'intelixencia artificial Categoría:Trabayadores de Google Categoría:Trabayadores de Microsoft Categoría:Alumnos de la Universidá Stanford