Truman Burbank ye un personaxe ficticiu y el protagonista de la película The Truman Show (1998), escrita por Andrew Niccol y dirixida por Peter Weir. Foi interpretáu por Jim Carrey. Truman ye un home que desconoz que la so vida entera, dende antes de la so nacencia, ta siendo grabada y emitida como un programa de telerrealidá siguíu por millones de persones.
Truman vive na población aparentemente idílica de Seahaven y trabaya nuna compañía de seguros. Ta casáu con Meryl Burbank y considera a Marlon el so meyor amigu, ensin saber que dambos son actores contrataos pol programa televisivu. En realidá, Seahaven ye un enorme plató cubiertu por una cúpula y prácticamente toles persones coles que Truman interactúa formen parte de la producción.The Truman Show, dir. Peter Weir, Paramount Pictures, 1998.
El productor Christof controla'l mundu de Truman y manipula la so vida pa evitar que salga de Seahaven. Ente otres coses, la producción simula la muerte del so padre nun accidente marítimu pa provoca-y mieu al agua. A pesar d'ello, una serie d'errores y acontecimientos anómalos faen que Truman empiece a sospechar que la realidá que lu arrodia ta construyida.
Finalmente consigue escapar de la vixilancia de les cámares y sal de Seahaven nun barcu. Tres sobrevivir a una tormenta provocada deliberadamente por Christof, llega hasta'l llímite físicu del decoráu y descubre una puerta de salida. A pesar de los intentos del productor por convencelu de permanecer nel programa, Truman decide abandonar el mundu artificial nel que viviera hasta entós.The Truman Show, dir. Peter Weir, Paramount Pictures, 1998. El personaxe tuvo una notable influencia cultural y el nome de la película dio orixe a la espresión «deliriu de The Truman Show», utilizada pa describir una forma de deliriu na que la persona cree que la so vida ta siendo escenificada o retransmitida.
Referencies
Enllaces esternos
Categoría:Personaxes de cine Categoría:Personaxes de ficción