Hui Ka Yan (chinu simplicado) o Xu Jiayin (chinu mandarín) ye un empresariu chinu, fundador de Evergrande Group. Foi un esitosu magnate que se fixo de bona sonadía, colos sos negocios, que diben dende el sector inmobiliariu hasta los deportes, ficiéndose propietariu d'un equipu de fútbol local (l'estinto Guangzhou Football Club), l'entretenimientu y les bébores.
Arrestáu en 2023, metanes la crisis inmobiliaria china, en 2026 declaróse culpable de los cargos que se-y imputaben qu'incluyíen malversación de fondos y sobornu corporativu, y foi condergáu a cadena perpetua .
Biografía Criáu pola so güela paterna, Xu Jiayin nació nuna aldega de la provincia de Henan en 1958. Graduose de la secundaria en 1975 y empezó a trabayar nuna granxa y de guardia de seguridá. En 1978 aprobó l'esame d'ingresu a la Universidá de Wuhan, onde estudió metalurxa financiáu con beques. Foi director d'una fábrica siderúrxica estatal en Henan.
En 1992, treslladose a Shenzhen (Hong Kong británicu) y 4 años dempués fundó Evergrande Group. En 10 años el grupu convirtiose nuna de les mayores empreses inmobiliaries del sur de China, per aciu de l'alquisición de terrenos y el llanzamientu de nuevos proyectos. Cola salida a la Bolsa de valores de Hong Kong convirtiose nel home más ricu del país. En 2021 según Forbes taba nel puestu 53 de persones mas riques del mundu con 10.700 millones de dólares.
Nel 2010, aprovechó la devaluación de les acciones del Guangzhou F.C. debíu al descensu del equipu a la Primer Lliga China (segunda división del futbol chinu) p'alquirir el 60% de la propiedá del club. El club convirtiose nel más galardonáu de China para finalmentre sumir en 2025 por cuenta de les deldes.
En 2017, Hui yera l'home más ricu d'Asia con un patrimoniu netu de 45.300 millones de dólares, según Forbes. Para 2023, el so patrimoniu netu s'envaloraba en 3.000 millones de dólares.
En xunetu de 2023, la so exesposa (Ding Yumei) llogró escapar nun vuelu a Canadá y un mes dempués llogró la ciudadanía canadiana.
En 2024, l'organismu regulador del mercáu de valores chinu impúnxo-y una multa de 6,6 millones de dólares y prohibióle pa tola vida l'accesu al mercáu de valores, argumentando que la unidá insinia de Evergrande enchía los sos beneficios y cometió fraude bursátil. Amás el Tribunal Cimeru de Hong Kong emitió una orde de conxelación global d'activos que prohibía a Xu, Ding y otres cinco partes relevantes xestionar activos globales valoraos aprosimadamente en 60 mil millones de dólares de Hong Kong. Esto incluyía los depósitos bancarios de Ding nel Reinu Uníu y el so luxosu apartamentu de Londres. Tamién, y a pesar de qu'un Tribunal británicu dexó nun par d'ocasiones l'usu de la so capital a Ding, ésti emitió una orde de rastrexu global d'activos colo que se conxelaron tamién los bienes de Ding.
Un documentu xudicial de xineru de 2025 reveló que Ding tenía activos globales por valor de más de 350 millones de dólares. Amás yera propietaria de 33 cases nel complexu residencial Thames City valoraes en 49,8 millones de llibres esterlinas que fueron adquiríes en septiembre de 2022, un añu dempués de que les autoridaes chines pidieren a Hui Ka Yan que pagara la delda col so patrimoniu personal. Tenía les propiedaes a traviés de cinco empreses de les Isles Virxes Britániques y el so axente d'arriendu y alministración yera la empresa d'Estaos Xuníos d'América Jones Lang LaSalle Incorporated.
N'abril de 2026, declaróse culpable de los ocho cargos rellacionaos cola so etapa como presidente de Evergrande y afirmó sentise arepentido. Ente los cargos atopaben l'usu indebíu de fondos, el fraude na recaldación de fondos y la captación illegal de depósitos del públicu. Foi sentenciáu a cadena perpetua y a la confiscación de bienes, mayores penes posibles polos delitos cometíos. Entá faltaba-y saber la pena polos cargos de concesión illegal de préstamos, emisión fraudulenta de valores y sobornu .
Finalmente n'agostu de 2026, foi condergáu pol Tribunal Popular Entemediu de Shenzhen a cadena perpetua, según a la perda de los sos derechos políticos pa tola vida y a la confiscación de tolos sos bienes por múltiples delitos, incluyendo apropiación indebida, fraude na captación de fondos, divulgación illegal d'información confidencial y sobornu corporativu. Coles mesmes, Evergrande Group foi multada con 1.125 millones d'euros y Evergrande Real Ta foi multada con 893 millones d'euros).
Vease tamién
Evergrande Group Crisis de Evergrande
Referencies
Categoría:Homes