Robu de la Cruz de la Victoria Suceso perpetráu na Catedral d'Uviéu en 1977, os años de la Tresición.
Fechos La madrugada del 10 d’agostu de 1977, Asturies espertó con una noticia que conmocionó a tol país: la Cámara Santa de la Catedral d’Uviéu fuera saqueada y una de les pieces más importantes del patrimoniu asturianu, la Cruz de la Victoria, acababa de ser robada y destrozada. Xunto a ella, los lladrones lleváronse tamién la Cruz de los Ánxeles y la Caxa de les Ágates.
Una xoya con más de mil años d’historia La Cruz de la Victoria ye una de les pieces más representatives de la historia d’Asturies. El so orixe ta nel reináu d’Alfonso III el Magnu, que nel añu 908 mandó cubrir d’oru una cruz de madera de carbayu con llimines d’oru y piedras precioses. La tradición relacionóla cola figura del rei Pelayo y cola victoria de Covadonga, y col pasu de los sieglos convirtióse nun símbolu fundamental de la identidá asturiana. La so imaxe acabaría formando parte del escudu del Principáu d’Asturies. La pieza nun tenía namás un enorme valor artísticu o económicu. Representaba una parte esencial de la memoria histórica d’Asturies y formaba, xunto con otres reliquies, el tesoru de la Cámara Santa de la Catedral d’Uviéu.
El robu Na nueche del 9 al 10 d’agostu, un rapaz gallegu de 19 años y caco de medio pelo, José Domínguez Saavedra, quedó escondíu nel interior de la catedral dempués de que zarraren les puertes. Aprovechando unes obres que se taben faciendo nel edificiu, consiguió llegar hasta la Cámara Santa y forzar les entraes. Primero intentara acceder a la caxa fuerte de la catedral, pero, al nun consiguilo, acabó descubriendo les pieces d’orfebrería de la Cámara Santa. Nun paez probable qu'un robagallines asina pudiera robar la cruz, él solu, ensin la complicidá del cabildru catedraliciu, anque la prensa del réxime callare.
El robu foi especialmente brutal. Los lladrones —anque Domínguez Saavedra acabaría declarando que participara solo— nun se limitaron a llevar les pieces: desmontaron y destrozaron les cruces pa arrancar les llimines d’oru y les piedres precioses. La Cruz de la Victoria quedó gravemente dañada, conservándose fundamentalmente’l so armazón de madera La mañana del 10 d’agostu, les emplegaes de la llimpieza descubrieron la puerta de la Cámara Santa forzada y les pieces esparcíes y mutilaes. La noticia provocó una enorme indignación n’Uviéu y nel restu d’Asturies. Miles de persones sintieron l’ataque como una agresión non solo contra la Catedral, sinón contra’l patrimoniu y la memoria colectiva del país.
La recuperación del tesoru Les investigaciones policiales permitieron siguir el rastru del botín. Parte de les pieces fueron recuperaes na frontera con Portugal y otra parte apareció nun vertederu de Xixón. A mediaos de setiembre de 1977, la Policía informó de la recuperación de cerca de dos quilos d’oru, fragmentos d’oru esmaltaos, piedres y otres partes pertenecientes a la Cruz de la Victoria, la Cruz de los Ánxeles y la Caxa de les Ágates. Munches de les piedres, sicasí, apaecieron rotas o machacaes.
Domínguez Saavedra foi deteníu en Portugal el 13 de setiembre de 1977. Posteriormente foi extraditáu a España y xulgáu pola Audiencia Provincial d’Uviéu. La Fiscalía solicitó una pena de más de dieciocho años de reclusión, amás d’indemnizaciones polos daños causaos.
Una restauración difícil La recuperación de les pieces nun significaba que’l problema tuviera solucionáu. Les xoyes quedaren tan estropiaes que la so restauración suponía un trabayu téunicu y artísticu de gran dificultá. En payares de 1977 creóse una comisión encargada de la restauración de les xoyes históriques de la Cámara Santa, y en 1979 empezaron los trabayos de recuperación de la Cruz de la Victoria, la Cruz de los Ánxeles y la Caxa de les Ágates. La Cruz de la Victoria foi finalmente restaurada y volvió a la Cámara Santa nel añu 1982. Dende entós, la pieza volvió ocupar el so llugar como una de les grandes xoyes del patrimoniu asturianu.
Un robu que quedó na memoria d’Asturies El robu de 1977 quedó grabáu na memoria colectiva d’Asturies porque nun foi un simple robu d’oru y piedres precioses. Lo que desapareció aquella nueche foi, durante unos díes, una parte visible de la historia asturiana.
La Cruz de la Victoria sobrevivió al saqueu, pero los daños que sufrió recuerden la fragilidá del patrimoniu históricu y la importancia de protexelu. Güei sigue siendo una de les imáxenes más reconocibles d’Asturies: una cruz con más de mil años d’historia que, dempués d’aquella nueche de 1977, volvió brillar na Cámara Santa d’Uviéu.
Referencies El robo que consternó a Asturias en 1977 El mayor robo de la historia de Asturias Robo en la Catedral
Categoría:Catedral d'Uviéu Categoría:Crímenes n'Asturies