El clima de Marte ye'l conxuntu de condiciones atmosfériques y meteorolóxiques que caractericen el planeta Marte. El planeta presenta un clima fríu y secu, condicionáu pola so distancia al Sol, la baxa densidá de l'atmósfera, formada principalmente por dióxidu de carbonu, y la ausencia de grandes mases d'agua líquido na superficie. Les temperatures pueden presentar grandes variaciones ente'l día y la nueche y ente distintes rexones del planeta.
Marte presenta estaciones de manera asemeyada a la Tierra porque la so exa de rotación tien una inclinación comparable. Sicasí, l'añu marcianu dura unos 687 díes terrestres y la órbita del planeta ye más excéntrica, polo que la duración y intensidá de les estaciones varia considerablemente ente los hemisferios.
El polvu desempeña un papel fundamental nel clima marcianu. Son frecuentes los remolinos y les tormentes de polvu, que pueden algamar dimensiones rexonales y, en determinaes ocasiones, espandise per prácticamente tol planeta. Marte presenta tamién nubes, xelu y casquetes polares que varien estacionalmente.
Les evidencies xeolóxiques indiquen que'l clima marcianu foi mui distintu nel pasáu. Redes de valles, antiguos llechos de llagos, deltes y minerales formaos en presencia d'agua indiquen que fai miles de millones d'años hubo agua líquido estable na superficie. L'estudiu de cómo Marte pasó d'eses condiciones al clima fríu y áridu actual ye una de les cuestiones centrales de la ciencia planetaria.
Referencies
Enllaces esternos
Categoría:Marte Categoría:Clima Categoría:Climatoloxía planetaria