Fernando de Ochoa Sánchez-Calvo (Avilés, 1820 - 13 de payares de 1879) Escritor, abogáu y alcalde d'Avilés del sieglu XIX. Foi padre del escritor Juan Ochoa y Betancourt.
Biografía Estudió Derechu na Facultá de Xurisprudencia de la Universidá d’Uviéu. Nos sos primeros años profesionales probablemente exerció l’abogacía n’Avilés, al empar que siguía formándose n’otros campos, especialmente nes disciplines científiques y históriques. Tamién estudió llingües clásiques, ente elles el llatín y el griegu.
Más tarde treslladóse a Cuba, que nesi momentu pertenecía a España. Ellí incorporóse a la Real y Pretorial Audiencia de La Habana, onde consiguió reconocencia como home de lleis y de cultura. Foi precisamente en Cuba onde desenvolvió les sos primeres actividaes conocíes como escritor, colaborando en periódicos habaneros y publicando dalgunes obres. Nesa etapa casóse con María Cleofé Betancourt.
De vuelta n’Asturies, establecióse de nuevo n’Avilés, onde combinó’l so trabayu como abogáu coles sos actividaes polítiques y lliteraries. Ente 1861 y 1864 foi alcalde d’Avilés, cargu que, según la fonte biográfica, desempeñó con aciertu y equidá.
Ochoa tamién tuvo una presencia destacada na prensa avilesina. Collaboró nos dos periódicos locales más antiguos y foi durante un tiempu director de La Luz de Avilés, onde escribió sobre cuestiones sociales, económiques ya históriques, amás de tratar asuntos rellacionaos cola alministración y el gobiernu de les provincies d’Ultramar. Nos últimos meses de la so vida collaboró tamién na Revista de Asturias, que empezara a publicase en 1879. La so participación política foi aumentando col tiempu. En 1874 foi escoyíu diputáu provincial pol distritu d’Avilés, cargu que desempeñó hasta 1877. Llegó a ser vicepresidente de la Diputación Provincial, y esta responsabilidá llevólu a treslladar la so residencia a Uviéu. Ellí abrió un bufete d’abogáu que consiguió prestixu rápidamente, al empar que siguía dedicándose a la política y a la escritura. En Uviéu collaboró tamién con diverses instituciones culturales. Ente elles destacó la Comisión Provincial de Monumentos, de la que foi vocal pola so condición d’académicu correspondiente de la Real Academia de la Historia.
Obres Memoria sobre la cuestión de Las Huelgas, Avilés, escrita en apoyo de los derechos municipales, La Habana, (1854) Situación difícil de Cuba en 1870, Avilés, (1870)
Referencies El Españolito: Fernando de Ochoa Betancourt La plaza y el mercado de Las Aceñas, en Avilés [file:///C:/Users/KIOSKO_BIBOVIW10/Downloads/Dialnet-LaPlazaYElMercadoDeLasAcenasDeAviles-72647.pdf]
Categoría:Alcaldes y alcaldeses d'Avilés