Antonio Álvarez de Argüelles (S.XVII) Relixosu dominicu asturianu del sieglu XVII, conocíu sobre manera pola so participación nel casu del rei Carlos II d'España, llamáu tradicionalmente «el Hechizáu».
Biografìa Foi vicariu del conventu de monxes de Cangas de Tineo —l'actual Cangas del Narcea— y ganó fama como exorcista.
Nel añu 1698, el confesor de Carlos II, fray Froilán Díaz, y l'inquisidor xeneral, fray Tomás de Rocabertí, recurrieron a Álvarez de Argüelles pa investigar si los males físicos y la infertilidá del monarca podíen debese a un supuestu maleficiu. L'interés pola cuestión taba venceyáu tamién al grave problema de la sucesión de la monarquía, yá que Carlos II nun tenía descendencia.
Fray Antonio yá tenía fama poles sos actuaciones como exorcista con unes monxes del conventu de Cangas. Por encamientu de les autoridaes eclesiástiques, realizó exorcismos y interrogó, según les fontes de la época, a los supuestos demonios que falaben al traviés de les monxes. Estes supuestes revelaciones afirmaben que Carlos II taba embruxáu dende la so adolescencia.
Les declaraciones atribuyíen el supuestu maleficiu a Mariana d'Austria, la madre del rei, anque estes acusaciones fueron posteriormente rectificaes. El casu provocó una gran polémica y acabó relacionándose col procesu inquisitorial contra fray Froilán Díaz. Los estudios históricos señalen, amás, que dalgunes de les versiones tradicionales sobre la rellación ente Froilán Díaz y Álvarez de Argüelles contienen errores o confusiones cronolóxiques.
La so figura quedó asina venceyada a unu de los episodios más singulares del final del reináu de Carlos II. La so intervención forma parte de la historia de les creencies relixoses y supersticioses de la España de finales del sieglu XVII, nun momentu nel que la enfermedá del monarca y la falta d'un heriedeiro provocaben una gran incertidume política.
Referencies El Tesoro de Oviedo Confesión de Antonio Álvarez, Exorcista de S.M. Carlos II El exorcista asturiano de Carlos II Los hechizos del rey
Categoría:Relixosos y relixoses d'Asturies